Kulturikkut nersornaasiuttagaq allanut neriorsuutigineqarsimagaluarpoq
Namminersornerullutik Oqartussat kulturikkut nersornaasiuttagaat ippassaq inuiattut ullorsiornitsinni Simon Mooqqu Løvstrøm-imut Enok Poulsen-imullu tunniunneqarpoq.
Nersornaasiineq Kultureqarnermut naalakkersuisup Doris Jakobsen-ip aggerfianiit Ilulissani ingerlanneqarpoq.
Nersornaasiisoqarnerani Maniitsumi aappariit tupigusunngitsuunngillat.
Maniitsumi utoqqaat aappariit juunip aallartinnerani Kultureqarnermut naalakkersuisumit Doris Jakobsen-imit sianerfigitipput, umimmaat qiviuinik annertuumik suliaqarnertik pillugu inuiattut ullorsiornitsinni kulturikkut nersornaaserneqassallutik. Allamulli oqaatigissanngilluinnaraat naalakkersuisumit oqarfigineqarput, nersornaaserneqartut inuiattut ullorsiornermi aatsaat nalunaarutigineqartarmata.
Aappariit tusagaq nuannaarutigeqaat, juunilli 25-ianni ernutaat apersortittussaammat angalanissaq eqqarsaatigalugu paasilluarusussimavaat nersornaasiineq sumi ingerlanneqassanersoq. Kultureqarnermut naalakkersuisup angalanissat misissorluareerlugit nuannaarluni aappariit paasitippai juunip 19-iani Ilulissanut aallassasut juunillu 22-iani Maniitsumut uterumaartut, apersortitsinissartillu angumerilluarsinnaagaat.
Aappariit nersornaaserneqarnissartik qilanaaraat, nersornaaserneqarnermilu aningaasartaat 25.000 koruuniusut aamma qilanaaralugit.
Taamali pisoqanngilaq.
Ullut qulit qaangiutiinnartut – tassa juunip qiteqqunnerani - Doris Jakobsen-ip allattaa aappariinnut sianerpoq, nalunaarfigalugit nersornaaserneqassanngiinnartut, nersornaasiineq allamut tunniunneqartussanngormat. Naalakkersuisup allattaa ajuusaarpoq, aappariilli neriorsorneqarput kingorna allamik nersornaaserneqarumaartut, oqaatigineqarsinnaanngitsorli nersornaasiineq qaqugu pissanersoq sunaassanersorlu.
Aappariit paasilluarsinnaanerarpaat kulturimut nersornaasiuttagaq pinnginnamikku, umimmaammi qiviuinik suliaqarneq kulturimut tunngavallaarani inuussutissarsiornermut tunngasuunerummat. Eqqumiigaalli kulturikkut nersornaasiuttagaq kiap pissaneraa naalakkersuisut suli aalajangiutinngikkaat, kultureqarnermut naalakkersuisup sianerfigisimammatsik nersornaaserneqartussatullu nalunaarfigalugit.
Kultureqarnermut naalakkersuisoq Doris Jakobsen pisoq pillugu oqaaseqartinniaraluaratsigu ullaaq naallugu pissarsiarisinnaasimanngilarput.
