Kulturikkut kingornussat nutsernermi karsini nassaarineqartut

Danmarkimi  katersugaasivissuup pisortarisimasaa Jørgen Meldgaard ukioq 2007-imi toqukkut qimagummat toqqortarisimasai karsit 15-it imaraat allattaaviit, ullorsiutit, assit filmiliallu Kalaallit Nunaaneersut Nunavummeersullu.

Toqqortaasimasut taakku katersugaasivissuarmi Nationalmuseumimi itsarnisarsiuunut iluatinnaatilerujussuupput taakkulu Jørgen Meldgaardip pigisaanik kingornussisut tunniussimavaat. Ukiuni sisamani ilimatusarnikkut erlinnartuutit imarisaasa suunerat saqqummiunneqartussanngorpoq.

- Katersukkat tigugatsigit, ingerlaanaq takusinnaasimavarput paasissutissanik ulikkaartut. Jørgen Meldgaard-ip ukiut 40-50-it matuma siorna ilisimatusarfigisimasai maanna atortorissaarutinik pitsaasunik atortulerluta, paasiniaaffigaagut, itsarnisarsiuuttut ilisimatooq Bjarne Grønnov oqarpoq.

Jørgen Meldgaardip misissuinermini najugaqarfiusimasoq Qajaa Qeqertarsuup tunuani inissisimasoq annertuumik misissuiffigisimavaa taannalu itsarnisarsiuunit maannamut ilisimasaqarfigineqarpianngilaq. Nassaanut ilaasimavortaaq, qilaat ukiunik 4.500-ujunik pisoqaassusilik.

- Maanna matut arlallit ammarneqartutullusooq ipput, inuunermi ukiut 4.500-ut matuma siorna qanoq issimanersoq annertuumik paasisaqarfigigatsigu, Bjarne Grønnov oqarpoq.

- Maannamut Saqqaq kulturip nalaani inuuneq maannamut ilisimaneqartunit erseqqarinnerusumik paasisaqarfigeqqipparput, Bjarne Grønnov oqarpoq.

Jørgen Meldgaard Qajaani nassaarisimasai, maanna Nunatta katersugaasiviani takuniarneqarsinnaapput. Taamaattorli Jørgen Meldgaardip toqussi sioqqullugu angumerisimanngilaa nassaat qanoq pingaaruteqartiginersut. Maanna Bjarne Grønnov Jens Fog Jensen suleqatigalugu nassaat pillugit atuakkiorput tassanilu aamma allaaseraat nunaqarfiusimasumi Qeqertasussummi nassaat.

Nunaqarfiusimasut taakku nassaarfigineqarnerisa immikkuullarissutigaat nunatsinni nunassittut siulliit atortui nassaassaammata qisunnit, saanernit nassunnillu sanaajusut.

- Maanna matut arlallit ammarneqartutullusooq ipput, inuunerummi ukiut 4.500-it matuma siorna qanoq issimassanera annertuumik paasisaqarfigigatsigu, Bjarne Grønnov oqarpoq.

Amerikami aningaasaateqarfiup The Rock Foundation-ip 8,5 millioner koruuninik aningaasaliineratigut pilersaarusiaq piviusunngorsinnaanngorsimavoq.

Ilisimatuut arfinillit tassani suleqataapput.

Nuup kangerluani Qajaani Filmi 1950-ikkunni immiussaq aamma nassaarineqarpoq. Filmi taanna Naalagaaffiup katersugaassiviata qarasaasiakkut nittartagaanni massakkut takuneqarsinnaalereerpoq.

Jørgen Meldgaardip suliaani aamma ilaapput Nunavumi Igloolimmi assaanermi nassaat paasissutissartaat. Taakkunani assaanerni nassaat Canada-mi naalagaaffiup katersugaasiviani takuniarneqarsinnaapput. Maannalu tassa Jørgen Meldgaardip allattugai, assiilsai filmiliaalu nunatsinnut utertinneqartussanngorput. Aamma Jørgen Meldgaardip Canada-mi nassaat pillugit suliat atuakkiarineqassapput.

Ilisimatusarneq issittumi killingusaaqarfik ukiup aappaa affaq ingerlanneqassasoq naatsorsuutigineqarpoq.