Kulturikkut illorsuassaq napparnersiorneqalerpoq
Sisimiuni kulturikkut illorsuassaq nutaaq ullumikkut napparnersiorneqassaaq. Qaliata quassuttuussai kingulliit ippassaani ikkunneqarput. Kulturip illorsuassaata toqqavia 1100 kvadratmeteriuvoq, sanasut sanatitsisullu ualeru nalunaaqutaq marlunut nappaanersiornissamut piareerput.
Nappaanersiorneq ingerlanneqartarpoq, napparneqartup siunissami sivisuumik atanissaa neriuutigalugu, tassalu tamannarpiaavoq Sisimiuni kulturimut ataatsimiititaliap siulittaasuata, Morten Siegstadip, kissaatigisaa.
- Kulturimut Illorsuup pilersinneratigut illoqarfimmi sammisaqartitsinerit nutaat pilissasut naatsorsuutigaarput, soorlu ataatsimeersuarnerit, pikkorissarnerit soorunamilu kulturikkut suliniutit amerlanerusut, Morten Siegstad Radioavisimut oqaluttuarpoq.
Nalunnguarfiup eqqaani nutaanik periarfissanik soqutiginartunik pisoqartalersinnaanera taassuma takorloorpaa, tatsimmi sinaaniippoq kulturikkut illorsuaq tatsillu illuatungaaniilluni sisorartartut peqatigiiffiata SSP-p illuutaa. Qaannat peqatigiiffiata Nalunnguarfimmi aasakkut sammisaqartitsisarnissamik pilersaarutai eqqarsaatigalugit tamaani ukioq naallugu illoqarfimmiunik sammisaqartitsisarnissaq piukkunnartorujussuuvoq, Morten Siegstad oqarpoq.
Kulturip Illorsuata 2007-mi septembarimi atoqqaarfissiorneqarnissaa naatsorsuutigineqarpoq, tassa pilersaarutigineqartumiit qaammammik ataatsimik kingusinaalaarluni.
