Kulturikkut illorsuassaq aalajangiiffigineqanngikkallarpoq

Sisimiuni kulturikkut illorsuassaq pillugu Sisimiut kommunalbestyrelsiani aningaasaqarnermut ataatsimiitsitaliaq ippassaq oqaluuserisaqarpoq. Suliariumannittussarsiuussisoqareersoq paasinarsivoq pilersaarummut aningaasartuutissatut missingersuutit 20 mio koruuninik aningaasartaqartut 50.procentimik amerlanerussasut.

Suliffeqarfiup suliarinnikkusuttup neqeroorutaa 32.mio koruunit angullugit aningaasaqartaqarpoq, aningaasaqarnermilu ataatsimiitsitaliaq aaliangerpoq suliassaq teknikkeqarfimmit misissorneqaqqissasoq akikinnerusumik neqeroorsimasut misissoqqinneqassallutik.

Suleqatigiissitaq borgmesterimit, aningaasaqarnermut pisortamit, teknikki pillugu ataatsimiitsitaliap siulittaasuanit, teknikkeqarfimmeersumillu inuttaqartoq suliffeqarfinnut akikinnerusumik neqerooruteqartunut oqaloqatiginnittussanngortinneqarpoq.

-Neqeroorutit nassuiaateqarfigitissavagut, sulilu akikinnerusumik sulisoqarnissaa ilanngullugu paasiniarneqassalluni, Sisimiut kommune-ani borgmester Hermann Berthelsen oqarpoq.