Kulturikkut eriagisassat pillugit ataatsimiipput
Ataatsimeersuarnermi katersugaasivinnit Kalaallit Nunaanniit, Savalimmiuniit, Danmarkimiit, Islandimiit Norgemiit aamma Sverige-miit peqataapput. Arfininngornerup tungaanut ataatsimeersuarneq pissaaq.
Ataatsimeersuarneq Kalaallit Nunaata kujataani pisussaasoq nalaatsornerinnaanngilaq, tassami Kujataata ilaa UNESCO-mut nunarsuarmi kulturikkut eriagisassatut sinnersuutinut ilaammat, taaguuserlugu "Kalaallit Nunaanni nunalerineq ukiuni 1000-ni", qallunaatsiaat najugaqarfigisimasaat Østerbygden eriagisassatut pingaarnertut ilaatinneqarluni.
Ataatsimeersuarnermi Nunani Avannarlermiut soqutiginnittut tamarmik periarfissinneqassapput qanganitsat nutaaliallu pillugit oqalliseqataanissaminnut.
Qanganitsat qanoq iluaqutigisinnaavagut ullutsinni pisut paasilluarnerujumallugit? Maanna pissutsinik ilisimasaqalernitsinni qanga pissutsinik paasisimasaqarnerulersinnaavugut? Apeqqutit tamakku ilagiinnarpaat ataatsimeersuarnermi oqaluuserisassat.
Oqallinnerit saniatigut oqalugiartoqartassaaq aammalu piffinnut ataasiakkaanut soorlu Qassiarsummut aamma Iagalikumut takornariartoqassalluni.
Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisup Mimi Karlsenip ataatsimeersuarneq ammassavaa.