Kulturi Ilinniartitaanerlu pillugit Nunani Avannarlerni ilaasortat Nuummiipput

Tikeraarnermi pilersaarutit pisussallu imaaginnavissut, kisianni aamma eqqumiitsuliortunik allatigullu kulturi pillugu aallutalinnik naapitaqarneq. Tassaavoq nunanit allaneersut alutorisartagaat, ingammik nunani avannarlerni Kulturi Ilinniartitaanerlu pillugit ataatsimiititaliami ilaasortaasunut. Taakku Nuummut kingornalu Islandimut paasissarsiorlutik sapaatip akunnera naallugu angalapput.

Kalaallit Nunaanni kulturi nunatsinnilu ilinniartitaanermut aaqqissuussineq sammivigalugit nunani avannarlerni Kulturi Ilinniartitaanerlu pillugit ataatsimiititaliami ilaasortat paasissarsiuutigalutik takornariarput.

Danmark sinnerlugu ataatsimiititaliami ilaasortaq, Mogens Jensen, Socialdemokratineersoq oqarpoq, kulturip tungaatigut ilinniartitaanerullu aaqqissuussiffigineqarsimanera, innuttaasullu taakkuninnga aallutaqartut qanoq atugaqarnersut annerusumik sukumiinerusumillu paasisaqarfigalugit pissarsiaqarluarluni.

-Nunani avannarlerni Kulturi ilinniartitaanerillu pillugit oqallikkaangatta, aammalumi aalajangerniaraangatta, pingaaruteqarpoq, namminneq takusaqarsimallunilu paasisaqarsimaneq, Mogens Jensen naqissusiivoq.

Namminerlu isummani annikkusullugu oqarpoq atuarfitsialak ukiuni arlaqartuni ingerlanneqalereersimasoq nuannersumik pissarsinartumillu paasisaqarfigisimallugu – taamatullu aaqqissuussinermut assingusumik qallunaat nunaanni aallartitsiniaasaarlutik ilinniartitsisut allallu akornanni suli oqallittoqaqaaq.

- Takusinnaavara atuarfitsialak iluarineqarlunilu iluatsilluartumik aallartinneqarsimasoq, tamannalu qallunaat nunaanni attuumassuteqartunit ilinniarfigineqarluarsinnaavoq. Taamaattumik takorloorsinnaavara siunissami aamma allat atuarfitsialak pinerullugu tikeraarusulissagaasi, Mogens Jensen naggasiivoq.

Nunani Avannarlerni Kulturi Ilinniartitaanerlu pillugit ataatsimiititaliami ilaasortat malittaallu katillutik 22-iusut Islandimut aqagu ingerlaqqissapput.