Kulturi ilaqutariinnik sullissinermi

Meeqqanik ilaqutariinnillu sullissisut, suliaqarfitik akimorlugit suleqatigiinnermik qulequtserlugu isumasioqatigeeqqammerput. Kulturikkut suliallit peqataatinneqarneranni ilaqutariit inuuneranni peqqinnerulernissamut sunniuteqarnerusinnaanerat, kulturi pillugu siunnersuisoqatigiiffiup siulittaasuata Peter Frederik Gedionsenip ilimagaa:

- Ilaqutariit ilaat timersornermik nipilersornermillu allarpassuarnillu aallussisarput. Ilaqarpulli aamma illua´tungerluinnaanik peqqinnanngitsumik ingerlatsisunik. Kulturikkut timersornikkullu suliaqartuusugut, tikkuusseqataasinnaavugut suleqataanissatsinnullu piareersimavugut.

Peqqinnissap aallunneratigut ajornartorsiutinik qaangiisinnaaneq ajornannginnerussasoq, Peter Frederiup ilimagaa.

- Massakkut ingerlatsineq malillugu, aatsaat arlaat aseroraangat suliniuteqalertarpugut. Isumasioqatigiinnerup takutippaa, peqqinnissarput aallukkutsigu ajornartorsiutit aaqqinneqarsinnaasut. Peter Frederik Gedionsen erseqqissaavoq.

Aamma isumaqarpoq matorpassuit atunngikkaluarlugit inunnik sullissiviit imminnut qaninnerullutik suleqatigiittuuppata, saaffiginnittoq ajornannginnerusumik sullinneqarsinnaagaluartoq.