Kultureqarnermut naalakkersuisoq nersornaasiissalluni neriorsuisimannginerarpoq.
Kultureqarnermut naalakkersuisup, Doris Jakobsenip,
aappariit utoqqaat Maniitsumeersut Inuiattut ullorsiornitsinni kulturikkut nersornaaserneqarnissaannik neriorsorsimannginnerarpai.
Maniitsumi utoqqaat aappariit juunip aallartinnerani Kultureqarnermut naalakkersuisumit Doris Jakobsenimit sianerfigineqarput, umimmaat qiviuinik annertuumik suliaqarnertik pillugu inuiattut ullorsiornitsinni kulturikkut nersornaaserneqassallutik.
Angalanissaat pisortaqarfimmit piareersarneqarpoq, paasitinneqarpullu juunip 19-iani Ilulissanukassasut 22-ianilu Maniitsumut utissallutik.
Aaappariit paasitinneqarput nersornaaserneqarnissaat allanut oqaatigineqanngilluinnassasoq, aappariillumi tamanna ataqqivaat, nersornaaserneqarnissartillu qilanaarilerlugu. Allatorluinnarli pisoqarpoq.
Juuni qiteqquttoq Kultureqarnermut naalakkersuisup allattaanit sianerfigineqarput nersornaasiineq allamut tunniunneqassasoq, aappariillu pakatsigaluarlutik paasinnipput, suliatik kulturimut tunngavallaaratik inuussutissarsiornermut tunnganerummata.
Kultureqarnermut naalakkersuisoq maanna neriorsuisimannginnerarluni oqarpoq.
-Taamaattoqanngilaq. Nersornaaserneqarnissamik piukkunneqartut sianerfigineqarnikuupput KIIIP-iminngaanit siunnersuutigilersaarigut, kingusinnerusukkullu naalakkersuisuni aalajangiisoqarumaartoq, ataatsimeereerpatalu sianerfigineqarumaartut, Doris Jakobsen oqarpoq.
Aappariit angalanissaat pisortaqarfimmit piareersarneqalereersimavoq, aalajangerneqarlunilu juunip 19-iani Ilulissanut aallassasut juunillu 22-ianni Maniitsumut uterumaartut. Tamannalu pissusissamisoortoq naalakkersuisoq oqarpoq.
-Nalinginnaasuuvoq suliariaaseq imaattoq: siunnersuutigineqartut naalakkersuisunut saqqummiuneqannginnerini paasiniaqqaartarput ajorinnginneraat taama siunnersuutigineqassagunik. Siunnersuutigineqartullu nersornaaserneqarnissartik ajorinngimmassuk piareersarneq aallartinneqareersimagaluarpoq. Aalajangiinerli naalakkersuisuni pisarmat uagut KIIIP-iminngaanniit allanngortissinnaanngilarput, Doris Jakobsen oqarpoq.
