Kultur aningaasarsiorfigineqarsinnaavoq

Tusarnaartitsisarnerit, isiginnaartitsisarnerit aqqummersitsisarnerillu inuussutissarsiutitigut siuarsaataasinnaappummi, takornariallu suliffissallu amerlinerannik aamma kinguneqarsinnaallutik:

Takornarianik misigisaqarluartitsisarnerit pillugit immikkut ilisimasalik Søren Würtz taama oqarpoq, Horsensimilu Holstebromilu pisut assersuutigalugit:

Kulturi qitiutillugu illoqarfiit taakku marluk pilersaarusiorput. Suliffeqarfiit suleqatigilluarpaat, pilerisaarisarlutillu, Søren Würtz oqarpoq, illoqarfiillu taakku marluk kultureqarnikkut iliuuserisartagaat aningaasarsiorniarnerannut malugineqarsinnaanersoq aperigatsigu, oqarpoq Horsens aamma Holstebro tassuunatigut takussutissaqarnerartut.

Kulturikkut misigisassat aqqutigalugit nunap immikkoortuanik Nunatsinni piorsaalluartut tassaapput Tunumiut.

Destination East Greenlandip pisortaa Anders Stenbakken oqarpoq kulturi aqqutigalugu misigisassaqartitsiniartarlutik:

- Nunaqarfinnukartitsisarnerput assersuutaasinnaavoq. Takornariat piniartukkormiunik malinnaatinneqarnerisigut kalaallit inooriaasaat itinerusumik misigisaqarfiusinnaavoq. Tassa assersuut siulleq, assersuut alla tassaavoq qimussersinnaanermik allagartaq. Takornariat taamaattumik allagartartaarsinnaapput, Destination East Greenlandip pisortaa oqarpoq.

Taanna aamma oqarpoq kulturi aqqutigalugu takornariat misigisaqartinneqartarnerisigut, Kalaallit Nunaanni aningaasarsiorneq pitsanngoriartuaartinneqarsinnaasoq. - Kulturi pingaaruteqartorujussuuvoq. Suliffeqarfiit amerlanerit kulturi aqqutigalugu imminnut nittarsaanniartarput, kulturikkut immikkuullarissuunerput nittarsaassinermi atorniarneqartarluni, Anders Stenbakken oqarpoq. Kulturi pillugu nutaamik politikkeqalernissaq, Kulturimut, ilinniartitaanermullu naalakkersuisup Mimi Karlsenip maanna suliniutigileruttorpaa, qanorpiarli imaqassanersoq oqaaseqarfigerusunngikkallarpaa.