Kultur 5 millioner koruuninik aningaasaliiffigineqalerpoq

Juliane Henningsen, Inuit Ataqatigiinneersoq inatsisartut oqaluttarfiannit nuannaarluni ullumi oqalugiarpoq
Allattoq Jaaku Lyberth
oktobarip 25-at 2007 14:52

Kulturimut aningaasaliissutit 2 millioni koruuninik amerleqqullugit siunnersuutaa inatsisartunit itigartinneqaraluarpoq nuannaarutaali tassaavoq 2 millioniinnaanngitsunik 5 millioni koruuninilli amerlanerusunik inatsisartut aappaagu kulturimut aningaasaliinialernerat.

Aningaasanut inatsisissaq naapertorlugu kulturi aappaagu 900.000 koruuninik aningaasaliiviginiarneqarpoq. Qularnanngitsumilli issatsiaq kulturi missukutaanerarlugu akerliussutsimik takutitsisut Naalakkersuisunik eqqarsariaallatsisimagunarput, naalakkersuisummi ullumi siunniuppaat kulturimut aningaasaliissutit aappaagu 5 millioner koruuninik ilaneqassasut.

Aningaasaliissut amerleriaataat isiginnaartitsinerup atuakkiornerullu siuarsarnissaannut atorneqassapput kiisalu Kalaallit Nunaanni filmiliornerup siuarsarnissaanut.

Kulturimut aningaasaliissutit amerleriaataannik aamma atugarissaarnerulersinneqassaaq, Kulturi pillugu siunnersuisoqatigiit ukiumut ataasiarluni nuna tamakkerlugu kulturisiortalernissamik aamma pilersaarusiortinneqartussanngormata.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq