Kullorsuarmiut nioqqutissanik pilersorneqaqqilerput

Kullorsuup pilersorneqarnera tusagassiuutitigut sammineqareersorlu, Kullorsuullu pilersorneqarnera pillugu qinikkat qisuariaateqareersullu, Namminersorlutik Oqartussat Qaasuitsullu Kommunia isumasioqatigiipput Pajuttaatip angalanera allanngortinneqarluni, umiarsuarlu Kullorsuarmukarsinnaalerluni. Umiarsuaq Pajuttaat Kullorsuarmut ippassaq ullaap tungaa nalunaaqutaq qulinut tikittussaagaluarpoq.

Pajuttaat Kullorsuarmut ullumi tikippoq.

Umiarsualiviup pisortaa Jakob Lennert, Radioaviisimut ullumi taama ilisimatitsivoq. Pajuttaat suli Kullorsuarmiippoq, unnugulu Nuussualiassalluni.

Tassanngaanniit Innaarsunnukassaaq, Nuugaatsiamut naggataatigullu Aasiannukassalluni. Naalakkersuisut ippassaq taama nalunaaruteqarput.

Tasiilami innuttaasut pilersorneqarnissaminnut sapaatip-akunneri marluk suli utaqqisariaqqassapput. Sila ajussanngippat Mary Arctica juunip 26-ani tikissangatinneqarpoq.
Royal Arctic Line-ili umiarsuarmik allamik kujataani piareersimatitaqarpoq, sikorsuillu ajoqutaassanngippata Tasiilamut tikissinnaassalluni.

Naatitat qerisullu Tasiilap nunaqarfiini nungussimasut, KNI-p nalunaarutigaa, nioqqutissalli pingaarutillit juunip 26-ata tungaanut naammannissaat aamma oqaatigaat.
Mary Arctica juunip 26-ani tikissinnaassanngippat, nioqqutissat Islandimit timmisartumik tikisinneqarsinnaassasut, tusagassiuutinut nalunaarummi atuarneqarsinnaavoq.