Kullorsuarmiut angallataat aserugaasut

Kullorsuarmi piniartut angallatitik piniutimillu amerlanersaat ippassaq annaavaat, nunaqarfiup avatinnguaniittoq iluliarsuaq aserormat.

Kullorsuarmi piniartut aalisartullu peqatigiiffianni siulittaasoq Ole Jensen ima oqaluttuarpoq:

- Ippassaq ullaakkut suli qaammarpianngitsoq iluliarsuaq sissamiit 300 meterit missaannaanni avasitsigisumiittoq assallappoq, malerujussuillu sissamut qaarput, taamaalimmallu umiatsiat sissap avatinnguani pitoaqqasut kinngorarsimallutik.

Umiatsiat ilaat puserarsimapput ilaallu kinngorarlutik.

- Qulingiluat eqqaanniittut pusinngapput sunaaffali ilaat aamma kiveqqasut, ilaallu kivingajaqqallutik quleruaannanngorsimasut, Ole Jensen oqarpoq.

Umiatsiat kivimmata pusimmatalu aallaaserpassuit piniutit allat VHS radiot aquuteralaallu umiatsianiittut aamma kivinnikkunik atorsinnaajunnaarput.

- Ajoraluaqaaq taama pisoqarmat, piniartullu umiatsiaminnik ippassaq aaqqissuillutik aallarteruttortut qilalugarsuaartoqarpoq, taamaattoqarnera piniartuulluni assut nuanninngilaq, Ole Jensen oqarpoq.

Taamaalilluni Kullorsuarmi piniartut isertitassaminnik annertuumik annaasaqartussanngorput, tamannalu pillugu Ole Jensen, piniartut peqatigiiffianni siulittaasutut Upernaviup kommuneanut ippassaq saaffiginnissimavoq Kullorsuarmi annaasanik takuniaasoqarniarnersoq piaartumillu iliuuseqartoqassanersoq paasiniarlugu.

Upernavimmi borgmesteri Jens Immanuelsen oqarpoq Kullorsuarmiut saaffiginnissutaat suli tigusimanngikkini, tiguguniulli qanoq pisoqarnissaa piaartumik naliliivigineqassasoq oqarpoq.