Kullorsuarmit Pilersuisumik oqaloqateqarusupput

Kullorsuarmiut Pilersuisumik oqaloqateqarusulerput, nunaqarfiup siunissami nerisassanik nunguutseqqinnginnissaa anguniarlugu. Nunguutsisoqarnerani nunaqarfimmiut annerusumik puisit neqaanik qaleralinnillu nerisaqarput, allaat meeqqat ulluni kingullerni atuariartortalersimallutik marengskage-nik (kaagiaqqat sukkulerujussuit, aaqq.)taquaqarlutik.
juunip 10-at 2011 15:01

Radioaviisimit ullut kingulliit oqaluttuarisarparput Pilersuisup Kullorsuarmi pisiniarfia nerisassanik nioqqutissaaruteqaqqasoq, tamatumalu kinguneranik nunaqarfimmiut puisit neqaanik qaleralinnillu nerisaqarnerulersimasut.

Maanna Kullorsuarmiut Pilersuisumik oqaloqaterasulerput, nioqqutissanik isumagineqarnertik pitsanngortikkusullugu:

- Maluginiarsimavarput Pilersuisoq nioqqutissanik maani nunaqarfimmi pisariaqartitatsinnik tikisitsineq ajortoq. Nioqqutissaatai pisariaqartitarinngilavut. Oqaloqateqatigerusuppavut, uagummi oqarluarsinnaaneruvugut suut amigaatiginerlugit pisariaqartinnerlugillu, Birgette Kammann Kullorsuarmi ilinniartitsisoq, nunaqarfimmiullu Pilersuisumut sapaatip akunnerani uani allagaqartut ilaat oqarpoq.

Saaffiginninneralli Pilersuisumit suli akineqarsimanngilaq.

Nunaqarfiit Peqatigiiffianni KANUNUPE-mit tupigusuutigineqarpoq Kullorsuarmi Pilersuisup pisiniarfia nerisassanik nioqqutissaataarussimammat. Tassami Kullorsuaq 425-it missaani inulik Nunatsinni nunaqarfiit inuttunersaasa ilagimmassuk.

- Una pingaaruteqarpoq nioqqutissanik naammattunik beestiilisoqartarnissaa. Isumaqarpunga siunissami qulakkiigassat ilagigaat. Tassami nioqqutissat ulluinnarni pinngitsoorneqarsinnaanngitsut umiarsuit naggataaninngaanniit sikooreernerani umiarsuaqarnissaata nalaanut, tassani piffissami naammattunik uninngasuuteqartarnissaq, taanna assut kissaatiginarpoq, Jens Kristian Therkelsen, nunaqarfiit peqatigiiffianni siulittaasoq oqarpoq.

Taassuma ilanngullugu aamma eqqaavaa peqatigiiffimminnit Kullorsuarmiunut tapersersuillutik allagaqarnissaminnut piareersimallutik.

Atassut Naalakkersuisunut aamma nioqqutissanik assortueriaatsimut isorinnittunut aamma ilannguppoq.

Knud Kristiansen aamma Siverth K. Heilmann ima tusagassiuutinut nalunaaruteqarlutik allapput:

- Atassummiit paaserusupparput Naalakkersuisut ajornartorsiut qaangerniarlugu qanoq iliuuseqarniarnersut. Akuerineqarsinnaanngilluinnarpormi Nunatsinni meeraqarmat nerisassaqanngitsunik nioqqutissanik assartuinerup amigarnerata kingunerisaanik. Maannakkut qanoq iliuuseqartoqartariaqarpoq.

Atassummiut tusagassiuutinut nalunaarumminni taama naqissusiipput.

Atassummiut taakkua marluk naatsorsuutigaat Naalakkersuisut akisussaatitsissasut, aammalu nunaqarfinni pilersuinernut malittarisassiortoqassasoq.

Nioqqutissanik pilersuinermi ajornartorsiutit Inuit Ataqatigiit aamma akuersaanngilaat. Olga Poulsen Berthelsen tusagassiuutinut nalunaarummini ilaatigut allappoq, Siumut-p siulittaasuata aammalu Atuisartut Siunnersuisoqatigiivisa siulittaasuata, pissutsit taama ilisimanerinut akuersaarinninnginnerat isumaqatigalugit.

- Ukiut amerlasuut ingerlaneri , ukiut tamaasa pissutsit taama ilisarnerat aaqqiivigineqartariaqarpoq, Olga Poulsen Berthelsen allappoq.

Pilersuisumit nalunaarutigineqarnikuuvoq umiarsuup siulliup Kullorsuarmut unnugu tikinnissaa naatsorsuutigineqartoq.