Kullorsuarmi pisiniarfimmi nerisassat nungupput

Kullorsuarmi, 425-it missaanni inoqartumi, Pilersuisup pisiniarfia apriili ingerlatilersorli nioqqutissaatiminik nunguutsiartulerpoq.

Ullumikkut pisiniarfimmi pisiassatuaanerusut tassaalersimapput immuk imerpalasoq, sodavandit, sunkistit, sikuaqqat, hvidtølit, miseqqiassat, ketchupit allaminaalunnguillu.

- Allanik tigoriagassanik uutassanik suaasanilluunniit pannakaassianilluunniit nioqqutissaaruppugut. Tassa tigoriagassaqanngilagut. Qaqortuliorsinnaanngilagut timiusiorsinnaanngilagut, qapuaraqanngilaq, soqanngilaq, Kullorsuarmi innuttaasut ilaat Emilie Olsen oqarpoq.

Taassuma ilanngullugu oqaluttuaraa meeraarpassuit ullaakkorsiornatik taquaqaratillu atuariartortariaqartartut:

- Isinnik uanga nammineq tusaasannillu takusinnaasannik uppernarsivara meeqqat ilaat qallunaaminernik tamulugassaminnik sussaqanngitsut. Taamaallaat neqit qalerallillu, Emilie Jensen oqarpoq.

Emilie Jensen nunaqqatinilu Pilersuisumut allagaqarlutik naammagittaalliuteqaramik akineqarput, umiarsuup siulliup tikinnissaa juunip qulingani pisussatut pilersaarutigineqartoq. Taamaattumillu timmisartukkut allatigulluunniit nioqqutissanik apuussinissaq Pilersuisumit pilersaarutigineqanngitsoq.

Pilersuisup Emilie Jensenimut akissummini, KNR-imiillu takusimasimatsinni, erseqqissaatigaa Royal Arctic Linelu isumaqatigiissimallutik, umiarsuaq talissinnaanngippat sikup sinaatigut inuussutissat pingaarnerit usingiarneqassasut.

Kullorsuarmi Pilersuisup nerisassanik pisiassaarunnerata saniatigut, sapaatip akunnerata naanerani anorersuareernerata kingorna attaveqaatit, tassa oqarasuaatit internetilu kipigaluarput. Tele Greenlandimiilli attaveqaatit iluarsineqaqqipput.