Kullorsuarmi illutaalersut
Ilaqutariit illussaat nutaarluinnaat tallimat Upernaviup nunaqarfiisa avannarlersaanni Kullorsuarmi napparneqaqqammerput.
Nammineerluni illuliassat pisariillisangaapput, ikkussuinnariaallutik iluatungaalu kingulliuttariannaalluni, illutaartussat ilaata Karl Lars Nielsen-ip ilaquttanilu illussartik naammassigaluattuarpaa, maanna illugisaminnut naleqqiuteqaarpaa:
- Anginerujusuuvoq, sisaminik initaqarluni, sinittarfiit marluk, ini perusuersartarfillu- assut iluaallatsitsissaagut.
Taanna oqarpoq maanna illugisartik ataasinnarmik initalik 1950-kkunnili sanaajusoq.
Ukiuni kingullerni nammineerluni illuliat naammassinngitsuukkat takussaagaluttuinnarneratigut, illuliassat ikkussuuteriaannaat amerlisarneqarnissaat Kullorsuarmi illuliortitsinermut siunertaavoq.
Panbo suleqatigalugu illuliassat ikkussuinnariaat nunaqarfinnut illoqarfinnullu siunissami neqeroorutaalissapput. Illuliassaq ataaseq milliuunet affaannik analeqarpoq, illusisullu illup nalingata 5 procentia, tassa 25.000 kronenik akiliissaaq, ukiuni 30-it missaanni akilerarneqartussanik.
Siornaak 2002-imi Ineqarnermut Pisortaqarfiup aalajangerpaa nammineerluni illuliassat naammassineqanngitsut naammassineqassasut. Suliniuteqarnerullu kinguneraa illut naammassineqanngitsut affaasa naammassineqarnerat.
