Kullorsuarmi illut pisoqalisimasut iluarsaanneqartut
Kullorsuaq aasaq manna ulapaarfiuvoq.
Illut 16-it qalipanneqarsimallutik qalipaatigilluinnarput, innuttaasullu tulluusimaarput.
Nunaqarfik sapaatit akunnialuit qaangiummata allaaneruvoq, tassa: illut qaliaat iluarsagassaallutik illullu amerlanerit qalipanneqartussaallutik.
Sapaatip akunnerata ingerlanerani iluarsaassisoqarpoq, tassani innuttaasut peqatigiiffimmiillu Kalaallit Meerartaannit kajumissutsiminnik suliaqartut nunanit allaneersut arfineq pingasut Kullorsuarmi illunik iluarsaasseqatigivaat.
Illuni 44-usunit 16-it iluarsaanneqalereersimapput, ilaqutariillu arfineq marluk illuisa qaliaat suliarineqarsimallutik.
- Illut amernikuupput. Nuna allamiuniit aamma Kullorsuarmiut ikattut suleqatigiinnikuupput. Illorpassuit naammassivaat, nunaqarfimmi sunngiffimmi aqutsisoq Birgitta Kammann Danielsen oqarpoq.
Kajumissutsiminnik suliartortut arfineq pingasut Danmarkiminngaanneersuupput, Spaniameerlutik, Frankrigimeersuullutik Letlandimeersuullutill. Ulluni marlunni kingusinaarlutik tikikkaluarlutik, suleqateqarnermikkut ullormullu sivisuumik sulisarnermikkut angummapput.
Tikillutillu suliartortut innuttaasunit iluarineqarput.
-Malugisimareerpagut suleqatikkuminartut. Tunniusimasut suliassaminnut taavalu sulerusussusillit. Qiimasut. Taamaammat qiimmassaataasorujuupput. Sulilluarnermillu kinguneqarluni aamma, suliniummut nunaqarfimmi attaveqaataasoq Abel Enok Hansen taama oqarpoq.
Nunaqarfimmi nutarterisoqarnissaa pisariaqartinneqarsimasoq
Kullorsuarmi illut pisoqalisimasut suliarineqarnissaat qangali pisariaqartinneqarsimavoq.
- Nunaqarfinnguatsinni illorpassuugamik qalipaataarunnikut, ajoraluartumik. Taava pisariaqartittorujussuunikuuarput illut qalipanneqarnissaat, Abel Enok Hansen oqarpoq.
Nutarsaanissarli oqittuinnaasimanngilaq.
Illut ilaat portusuujupput toqqaaviisalu eqqaat manissuinnaanatik. Taamaattumik ikorfalersorluni suliarineqartariaqarsimapput.
- Illut ilaat portusuujupput. Taava 1 - 2 - 3 amerneqarsinnaanatik. Kisianni iluatsissimavoq, Birgitta Kammann Danielsen oqarpoq.
Tamanna aamma Abel Enok Hansenip ilalerpaa, illullu qattorngit qaaniittut ilungersunarnerarlugit.
- Sulinitsinni unammillernarnerpaavoq illut eqqai, nunataa assigiinngittaqattaarnermut. Taamaalilluta stilladsit pisariaqartittorujussuullutigit tamaani.
Iluarsaassinerilli suli naammassinngillat. Nunaqarfiup illui amerlanerit nutarsarnissaat pilersaarutaavoq.
Innuttaasut aamma nutarsaaqataapput
Iluarsaassinissap pilersaarusiorneqarnerani Kullorsuarmi innuttaasut qanimut suleqatigineqarput.
Innuttaasut 40-t tungaannut ullormut suleqataasarput. Ilaat amiillutillu illunik iluarsartuussipput, ilaallu sulisunut nerisassiortarlutik.
- Iggavimmi sulisoqarnikuuvugut, pissutigalugu aamma nerisariaqarput, nukeqartariaqarput. Taava iggavimmi ullaamiit unnuup tungaanut sulisimapput. Pausep nalaani maani kajumissutsimik sulisut nerisimapput, Birgitta Kammann Danielsen oqarpoq.
Taassuma, suliniut nunaqarfimmi ataatsimoornerulersitsisimanerarpaa.
Ilaqutariit, inuusuttut inersimasullu imminnut ilisarisimavallaarsimanngitsut suleqatigiilerput.
Inerneralu ersarippoq.
-Nunaqarfipput eqqarsaatigalugu assut ilorraallappoq. Illunnguit qalipaataarunnikut isigalugit tujorminalaartarami. Nutaamik qalipaateqalerneri assut qiimmaallannarpoq, kusatsiallattorujuupput, Abel Enok Hansen oqarpoq.
Illut arlallit qalipanneqarnissaannut qalipaammik naammattumik suli peqarpoq illullu aamma arlallit qaliaasa suliarinissaannut qalissiaateqarlutik. Kajumissutsiminnik sulisut nunanit allaneersut juulip 31-anni aallarput. Innuttaasulli 25-t iluarsaassinertik silagitsillugu ingerlatiinnarusuppaat.
Grønlandske Børn - Kalaallit Meerartaat Kullorsuarmukarnissaminnut 2019-imili aasakkut pilersaaruteqalerput. Illut iluarsaanneqarnissaannut aningaasaliisoqarmat, kajumissutsiminnik suliaqartartut ikiorsiullugit qalissialersuisoqarsinnaanngorlunilu illunik qalipaasoqarsinnaasunngorpoq.
Aaqqissuisut suliniutip aappaagu ingerlateqqinneqarnissaanut maanna neriuuteqarput.
- Nunaqarfimmi inuunitsinnut sunniuteqarluartumik taama annertutigisumik suliaqarsinnaallutalu angusaqarsinnaagutta sunaluunniit sapinngilarput, Birgitta Kammann Danielsen tusagassiuutinut nalunaarummi taama oqarpoq.
