Kullorsuarmi cigaretiutaarullutillu sodavandiutaarupput
Kullorsuarmi Upernaviup avannaaniittumi sodavandit sapaatip akunnera kingulleq nungupput. Cigaretit poortat kingulliit ippassaq tunineqarput. Nioqqutissalli nutaat maanna aggiunneqarput.
- Nuup eqqaani umiarsuup ikkarlinnera pissutigalugu sodavandinik cigaretinillu nunguutsivugut, Kullorsuarmi Pilersuisumi ningiuugallartoq Marianne K. Kristensen KNR-mut oqarpoq.
Umiarsuaq assartuut Nuup avataani aggustip 14-at ikkarlippoq taamanilu usigai nioqqutissat avannaani pisiniarfinnut nassiussat.
Ikkarlinnerup kinguneri maanna Kullorsuarmiut malugaat.
- Nioqqutissat neqeroorutaasussagaluit amigaatigaavut. Aamma naalugiarsunnut milutsitassat NAN1-it nungullattaapput, qujanartumilli taakku pissarsiareqqereerpagut, Marianne K. Kristensen oqarpoq.
Umiarsuaq pajuttoq maanna Kullorsuarmukarpoq ilaatigut sodavandinik usilluni. Cigarettit nassiunneqarumaarput tullianik Upernavimmiit timmisartoqaqqippat.
- Qujanartumik inuussutissanik pingaarutilinnik amigaateqanngilagut - NAN1-nik amigaateqallattaanerput eqqaassanngikkaanni, Marianne K. Kristensen oqarpoq.