Kullorsuarmi atuarfittaalerput
Kullorsuarmiut titartagaannartiguunnngitsoq aappaagu kiisami atuarfittaartussanngorput, 21,3 million koruunilimmik, naalakkersuisut akuersissappata.
Ukiuni arlalinni atuarfilunneq taamaalilluni qaangiuttussanngussaaq.
Nutaamik atuarfittaarnissaq naalakkersuisut ualiartoq ataatsimiinnerani oqaluuserineqartunut ilaasoq pillugu, Naalakkersuisut siulittaasuat Hans Enoksen, Ilulissaniittoq ullumi oqarpoq:
Sivisunerpaamik aappaagumut nutaamik qaarsumut toqqavilerlugu atuarfiliortoqassaaq angissutsimigut naapertuuttumik. Atuarfitoqaq iluarsaannagu.
Naalakkersuisulli akuerseqqaartussaapput aningasallu qinnutigineqartussaallutik. Hans Enoksen-ip naatsorsuutiginerarpaa naalakkersuisoqatigiit akuersaarumaartut nutaamik atuarfiliornissaq siunnerfigineqareermat.
Qinnutigineqartussallu 21,3 million koruuniupput.
Taamaattumik Hans Enoksen isumaqarpoq taamaaliornikkut nunaqarfimmut pitsaanerpamik tamanna aalajangiinerussasoq.
Ilumut Kullorsuarmiut massakkut naatsorsuutigisinnaanerlugu nutaamik atuarfittaarnissaq:
_ Tassa pimoorunneqarpoq, aamma kinguartitseqqitoqaqqinnavianngilaq, uaniuna massakkumut kinguartitsinermut pissutaasoq toqqaviata ajornartorsiutaanera. Tassalu naalakkersuisut siulittaasuata neriuutigilluinnarpaa aappaagumut sananeqassasoq.