Kullorsuaq ukiuni kingullerni sikkorluttarpoq

Issittumi silaannaap ukiuni kingulliunerusuni allanngoriartornera avannaani sikusarfiusuni maluginiarneqarpoq. Ingammik Qaanaami sikkorluttalersoq piniartoq Jens Danielsen ullumi radioaviisimut oqarpoq. Jens Danielsenip taama oqaluttuarnera Kullorsuarmi aamma ukiuni kingullerni takornartaajunnaarsimsoq, Kullorsuarmi nunaqarfiup siulersuisuini ilaasortaq Edvardt Nielsen oqaluttuarpoq.

-Sikuusarnermut ukiuni kingullerni qulini ajorsiartorsimavoq, ukioq mannalu aatsaat taama taama sikkorlutsigaluta. Kullorsuarmiit avammut 18 kilometerit missaanni sikukkoorluni immaq tikittariaqarpoq. Taamaanneralu avannamut avungarsuaq taamaappoq.

Kiatassuarmiit timmisartuaaqamut ilaasut eqqartorpaat Kiatassuarminngaanniit Nuussuup tungaanut siku seqummakuusoq. Tassa imaappoq Kiatassuaq uiarlugu qimussimik Nuussualiarneq ajornaqaaq.

Edvardt Nielsen aamma oqarpoq nannut siornagut avasissumiittartut sikup sinaava tiffarmat tiffaqataasimasut, piniarrtullu qangatut avataanut nannunniarsinnaanngitsutm, Kullorsuarmiit ungasinngitsumi nannuttalersimasut. Avasissumut nannunniartoqarsinnaajunnaarpoq, naak ukioq manna 50-inik nannutassiisoqaraluartoq.

Taamaattorli Kullorsuarmiut ilaat aallaannarlutik nannuttarsimapput. Tamanna nannut sinerissamut qanittumiilersimanerannik takutitsisoq Edvardt Nielsen oqarpoq.

Savissivimmi piniartoq Qaerngaaq Nielsen aamma paasiniaaffigaarput. Taanna oqarpoq Savissivimmiit kujammut Qimusseriarsuup ilaa isigisinnaasartik ilanngullugu ukioq manna sikkorissaartoq, taamaattorli sikup sinaa ukiuni kingullerni malunnartumik tiffariartortoq Qaerngaaq Nielsen oqarpoq.