Kullorsuaq attaveqanngitsoq

Kullorsuarmi innuttaasut nunarsuatta sinnerata avataaniitsitaasimappullusooq, avammut attaveerunnerup kinguneranik inuussutissarsiorneq tamavimmi unissimavoq, innuttaasut bankimut aningaasanik aallersinnaasimanngillat, pisiniarfimmi pisiniarsinnaasimanatik piniartullu tunisisinnaasimanatik.
Allattoq Else Løvstrøm
januaarip 19-at 2010 05:33

Kingullermik januaarip pingajuanni attaveerukkamik ippassaq aatsaat attaveqaleqqissimasut, piniartoq Themotheus Petersen oqaluttuarpoq.

Ilinniartitsisut atorfilittallu allat juulli aqagummut inunnik isumaginnitseqarfimmiit rekvisitionimik tunineqarsimapput pisiniarsinnaaniassammata. Taamatuttaaq piniartut aningaasanik tigusitinneqarsimapput imaluunniit inunnik isumaginnitseqarfimmiit ikiorserneqarsimallutik.

Sermernartuliornera ajutoornermut peqqutaasoq, Telep attaveqarnermut pisortaa Maliinannguaq Markussen-Mølgaard oqarpoq.

- Masannartulioriarluni issilertarsimavoq, taamaasillunilu attaveqaatit innaallagialiorfia ajoqusertarlugu, Maliinannguaq Markussen-Mølgaard nassuiaavoq.

Utaqqisariaqarnerujussuarmulli silarluttarnerata peqqutaaqataavoq. Qulimiguulik avannamukartoq siulleq teknikkikkut ajoquteqalerluni utertariaqarsimavoq. Qulimiguulik alla avannamukartinneqarmat attaveqaatit iluarsineqarsinnaasimapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq