Kukkusoqarsimanera Peqqinnissaqarfiup qullersaqarfiata ajuusaarutigaa
Arnaq Nuummi Nakorsiartarfimmit ilisimatinneqarsimavoq illissap paavatigut kræfteqalersinnaanissamik takussutissaqanngitsoq. Taama ilisimatitsisoqarpoq, naak misissuinerit takutissimagaluaraat arnap illissami paavatigut kræfteqalernissaanik ilimanaateqaraluartoq.
Arnaq pineqartoq 2011-mi misissorteqqikkami paasitinneqarsimavoq illissami paavatigut kræfteqalersimasoq, piaartumillu suliarineqartariaqartoq.
Sinerissami peqqinnissaqarfinni suleriaatsit naammaginarnersut, allanngortinneqartariaqarnersulluunniit, Peqqinnissaqarfiup Qullersaqarfiata misissuleruttorpaa. Nakorsat qullersaat Anne-Marie Ulrik ima oqarpoq:
- Misissuinermi inernerit suliarineqarneranni inuup arlaatigut kukkusimanissaa ilimanarpoq, nakorsiartullu kukkusumik ilisimatinneqarsimanera ajuusaarnarpoq, nakorsat qullersaat Anne-Marie Ulrik oqarpoq.
Qallunaaq 32-nik ukiulik Karina Brudlykke, Nuummi 2007-imi sivikitsumik najugaqarnermi nalaani illissami paavatigut kræfteqalersimanermut misissortissimavoq, misissuinermilu tigusat Rigshospitalimut nassiunneqarlutik. Inernerit Nunatsinnut kingorna taava nassiunneqarput, tassanilu kukkusoqarsimalluni.
- Misissuinerit inernerini allaqqavoq kræftinnguussinnaasunik naasoqarsimasunga. Nakorsiartarfimmiilli akissutisigama pappialani allanneqarsimavoq sumilluunniit taasassartaqanngitsoq, Karina Brudlykke oqarpoq, 2011-milu misissorteqqikkami paasitinneqarsimavoq illissami paavatigut kræfteqalersimalluni, piaartumillu suliarineqartariaqarluni.
Naammassilluartumillu suliaritereerami akisussaaffiliisoqarnissaa anguniarlugu naammagittaalliuummik 2013-imi allagaqarpoq. Danmarkimili maalaartarfiup suliaq pisoqalisimanerarpaa, suliarlu tigujumanagu.
Nakorsat qullersaata Anne-Marie Ulrikip oqaatigaa suliaq ingerlateqqissinnaanngitsoq, ukiut tallimat qaangiutereersimammata. Kisianni soorlu oqartoq sinerissami peqqinnissaqarfinni suleriaatsit naammaginarnersut, allanngortinneqartariaqarnersulluunniit maanna mississorneqaleruttorpoq, taamatut kukkusoqaqqinnginnissaa anguniarneqarluni.
Misissuisimanerni akissutit napparsimmavimmut apuukkaangata taava maanna qanoq iliortoqartassava? Tamanna erseqqarissunik maanna malittarisassaliuunneqassaaq, akissutit kukkuneqanngitsut tunniunneqarsinnaanngorniassammata.
- Naammagittaalliuutit pisoqalisarnerat pillugu nakorsaaneqarfimmi naammagittaalliortarfimmilu malittarisassiortoqarnikuuvoq, taamaammat suliat pisoqalisinnaanerannut sooq malittarisassaliortoqarsimanersoq paaserusukkukku nakorsaaneqarfimmut saaffiginninnissat innersuussutigissavara, nakorsat qullersaata Anne-Marie Ulrik oqarpoq.
