Kukkusoqarsimanera nassuerutigaat

Aasianniit Saviminilerinermik Ilinniarfimmut saffiuutut ilinniariartoraluarluni kollegiami inissaqannginnini pissutigalugu Aasiannut angerlartinneqarnissaanik aalajangerneq kukkunermik tunngaveqartoq Nuummi kollegieinspektøreqarfimmiit Radioavisimut nassuerutigineqarpoq.
Allattoq Elisa Isaksen
aggustip 01-at 2008 10:44

Qanoq ililluni kukkuluttortoqarsimanersoq paasiniarlugu ilinniartut inissaqartinneqarnerannut pisortaqarfimmi ippassaq ualikkut ataatsimiittoqarpoq.

Aasiammiu 17-inik ukiulik Aputsiaq Rafaelsen Olsen Radioavisimut sisamanngormat oqaluttuarpoq kollegiami inissaqannginnami Nuumi akunnittarfimmut inissinneqarluni, Aasiannut angerlaannarnissaminut billetimikik tunineqareerluni. Aputsiaq R. Olsen kisimi inissaqanngissimanngilaq. Radioavisimi nalunngilarput Alluitsup Paa-neersoq ulluni kingullerni aamma taama naammattuugaqarsimasoq. Aputsiaq oqarpoq taama naammattuugaqarneq nuanninngitsoq, aammalu ilinnialernissaminut minnerpaamik ukiumik ataatsimik kinguartoortussanngorluni oqarluni.

Ilinniagaqartut ineqartitaanerannut qullersaqarfimmut attaveqartaraluaratta oqaaseqarsinnaasumik suli pissarsinnginnatta qullersaqarfimmi ippassaq ataatsimiinneq qanoq angusaqarfiusimanersoq suli paasinngilarput. Aputsiaq R Olsen-ili ulloqqqalersoq oqarpoq kollegiaanngitsumi inisimasutut Saviminilerinermik Ilinniarfikkoortumik inissarsissunneqarsimalluni.