Kukkunikkut marloriaammik kujataani akileraartitsisoqartarsimavoq
Napparsimanersiutillit annetussusileriikkanillu ikiorsiissutinik pisartagallit akileraartussapput. Kisianni Qaqortumi akileraarnermut immikkoortumit pasitsaanneqarpoq, najugaqarfiit ilaani Isumaginninnermi Akissarsialeriffiillu immikkoortui kukkullutik marloriaammik akileraartitsisarsimassasut.
Narsarmiu Phillipus Tittusen 2007-miilli marloriaamik akileraartinneqartarsimasut ilagaat.
- Pensionera mikinermik skattefradragera tamaat nuliannut tunniunnikuugaku kingusinnerusumut utaqqisinnagit aningaasat tigunissaat aallaavigigatsigit. Ajornartorsiut ilisimaleratsiguli 2008-mi isertitat 2009-mili sorsuutigileratigit iluarsiivigeqqullugit, ulloq manna tikillugu iluarsiivigineqanngillat. Akunnattunik aningaasarsiaqarluni aningaasarpassuarnik naleqarpoq, taama oqarpoq Phillipus Tittussen.
Nunarpullu tamakkerlugu ajornartorsiutaasimassappat annertoorujussuususssasoq aamma oqaatigaa.
Akileraanermut Qaqortumi immikkoortumit ilisimatinneqarpugut, sulisitsisut kukkussutaanik taama taama pisoqarsimasoq, tassa imaappoq, najugaqarfiup Inunnik Isumaginittoqarfiani.
- Nappasimanersiutinik annertussusileriikkanillu ikiorsiissutinik pisartagallit illoqarfimminni isumaginnittoqarfimmut saaffiginnissapput qinnuvigalugillu aningaasat namminermut tunniunneqarsimasut marloriaammik akileraaruserneqarsimanersut misissoqqullugit imaluunniit allatut kukkusoqarsimanersoq paaserusullugu, taama oqarpoq Peter Petersen Qaqortumi Akileraanermi immikkoortumi pisortaagallartoq.
Peter Petersen aamma oqarpoq, najugarisap kommunip allaffiani kukkuneq iluarsineqareerpat aatsaat, paasissutissat nutaat akileraarnermut immikkoortumut nassiunneqassasut tassanngaanniillu aatsaat ilisimatitsissutigineqarsinnaasoq aningaasat akileraarutissat eqqortut qanoq atsigissanersut.
