Kukkunikkut angalanissat tamarmik unitsinneqartut

Meeqqat qissattut, angalasussat kaallutik naammagittaalliortut takussaasimasinnaagaluarput, taamaattoqanngilarli. 
Air Greenlandip nittartagaani kukkunikkut timmisartut aallartussat 13-i tikittussallu 13-t taamaatiinnarneqarsimasut pingasunngornermi ualikkut takuneqarsinnaapput. 

Taamaattorli ilaasut angalasussallu untritilikkaat ingerlaqqinneq ajulertut takussaanngillat. Tassami Air Greenlandip nittartagaani kukkunikkut timmisartut taamaatiinnarneqarsimasutut allassimapput. Taakkuli angalanissamut pilersaarutit nittartakkamiittussaanngikkaluartut systemillu ajutuulaarneratigut nittartakkamiittut Air Greenlandimit ilisimatitsipput. 

Timmisartut angalasut pingasunngornermi taama amerlatigineq ajortut aamma timmisartut angalasussatut allassimasut tassaniittussaanngikkaluartut kukkunikkulli nuisittoorneqarsimasut, Air Greenlandimi attaveqaqatigiinnermik suliallip, Emil Nørgaard Stachip KNR-imut ilisimatitsissutigaa. 

Air Greenlandip IT-lerisuata nittartakkami suna ajornartorsiutaanersoq misissussagaa innuttaasullu paasissutissanik eqqortunik pisinnaanngornissaat anguniarlugu piaartumik aaqqiissuteqartoqassasoq, Emil Nørgaard Stachip oqaatigaa.