Kukkunersiuisut isumaliutissiissutaat aappassaaneerneqassaaq
Ilaqutariinnermut Pisortaqarfimmi aningaasanik 13 million koruunit sinnerlugit atuivallaartoqarsimaneranik Aatsitassanullu Pisortaqarfimmi ilassinnissutissanik atuisimanermut atatillugu immersuinerliortoqarsimaneranik imaqartoq Inatsisartuni Kukkunersiuisarnermut Ataatsimiititaliap isumaliutissiissutaa, Inatsisartut ullumi ataatsimiinnerminni aappassaaneerlugu oqaluuserissavaat.
Namminersornerullutik Oqartussat ukioq 2004-mi naatsorsuutaat ajorisassartaqanngitsut Ataatsimiititaliaq isumaliutissiissummini naliliivoq.
Taamaattorli Kukkunersiuisarnermut Ataatsimiititaliaq arlalinnik uparuaateqarpoq. Pisortaqarfiit pineqartut saniatigut Naalakkersuisut siulittaasuat Hans Enoksen uparuarneqarpoq Ineqarnermut Attaveqarnermullu naalakkersuisuusimasumut akeqanngitsumik ineqartitsisoqarsinnaasimanermut tunngasumik.
Kukkuneq tamanna Naalakkersuisut allattoqarfianni pisimasoq Naalakkersuisut siulittaasuata akisussaaffianiippoq, Kukkukersiuisarnermut Ataatsimiititaliaq taama uparuaavoq. Kukkunersiuisarnermut Ataatimiititaliami tallimanik ilaasortaqartumi Kattusseqatigiit Partiiat kisimi ilaasortaatitanngilaq.
