Kukkunersiuisoq annertuumik akisussaaqataanerarneqarpoq
Kukkunersiuisut akuersisimanngitsuuppata Puisimi siulersuisut qularnaveeqqutissanik qinnuteqarsimanavianngikkaluartut, Namminersorlutik Oqartussat eqqartuussissuserisuat ippassaq suliamik ingerlatsinermi naliliivoq.
- Kukkunersiuisup akisussaaqataanini annertooq tigusariaqarpaa, eqqartuussissuserisoq Jesper Müller oqarpoq.
Puisip orsuata kiilumut 500 koruuninik akilersinniarneqarnera eqqartuussisuserisup immikkut aalassassimaarutigaa.
Tassami missingersuutit eqquutsinneqarnissaannut Kangianiillu isaatitsinissamut, taamatullu Puisip ingerlaannarnissaanut naatsorsuutigineqarmata.
Kinami piginneqatigiiffik puisip orsuanik kiilumut 500 koruuninik ilumut akiliiniarnersoq paasiniarlugu kukkunersiuisoq David Stevensimut sianeriaannaasimasoq, Namminersorlutik Oqartussat eqqartuussissuserisuata erseqqissaatigaa.
Aningaasat 12 mio. koruunit aningaaserivimmit akuerineqarsinnaanissaat aamma qularnaveeqqusiissutip Namminersornerullutik Oqartussaasimasunit akuerineqarnissaa taamatut iliornermut eqqartuussissuserisup pissutaanerarpaa.
Taamaalillunimilu kukkunersiuisoq suliami immikkut ittumik akisussaassuseqartoq, Namminersorlutik Oqartussat eqqartuussissuserisuata oqaatigaa.
Orsup kiilumut 500 koruunininik akilersinneratigut Kalaallit Nunaanni piginneqatigiiffimmut isertitat annersaat tuttartussanngornissaat Kinamilu piginneqatigiiffimmut pinnatik, kukkunersiusup Ole Hansenip eqqartuussivimmi nassuiaanermini oqaatigaa.
Taamatut akimik qaffasitsigisumik aalajangiineq ajortortaqanngitsoq Ole Hansenip oqaatigaa, akigitinneqartorlugu Kinamit qanoq ilillugu akilerneqarsinnaanersoq nassuiarnagu.
