Kukkunersiuisarneq pillugu siunnersuut Espersenip Transparencyllu isumaqatigiinngissutigigaat
Naalagaaffiup kukkunersiuisui Namminersorlutik Oqartussat naatsorsuutaanik kukkunersiuisalerlik. Taamaaliortoqarneratigut politikerit atorfilittallu Kalaallit Nunaata karsiata aningaasaataanik atornerluisinnaanerat pinngitsoortikkuminarnerussaaq.
Dansk Folkepartiimi siulittaasup tullia Folketingimilu Kalaallit Nunaannut tunngasunut ataatsimiititaliami ilaasortaq, Søren Espersen, nunatsinni politikkikkut sapaatit-akunnerata siuliani pisut kingorna taama siunnersuuteqarpoq.
- Naalagaaffiup kukkunersiuisui pitsaalluinnartumik sulipput, Kalaallit Nunaatalu taakku akeqanngitsumik atorsinnaavaat. Naalagaaffiup kukkunersiuisui kalaallit atoqqilertariaqaraluarpaat. Taava kingullertigut pisut assinginik pisoqannginnissaa qulakkeeruminarnerulersinneqassaaq, Søren Espersen KNR-imut taama oqarpoq.
Atornerluisoqarsimanera Deloittemit paasineqarpoq
Namminersorlutik Oqartussat naatsorsuutaat kukkunersiuisarfimmit Deloittemit ullumikkut kukkunersiorneqartarput. Kukkunersiuisarfimmiillu tassannga Aleqa Hammondip Kuupik Kleistillu nunatta karsianit taarsigassarsisimanerat paasineqarpoq
AAMMA ATUARUK Aleqap Nunatta karsia atornerlukkaa
Tamanna naammanngitsoq, Søren Espersen isumaqarpoq.
- Tamanna soorunami qujanarpoq, pisorli aamma illuatungeqarpoq, suliffimmummi attuumassuteqanngitsumik aningaasanik atuisoqarsimanera kukkunersiuisunit matumani paasineqarpoq.
- Suliniutinummi eqqumiitsorpassuarnut aningaasarpassuarnik aningaasaliissuteqartoqarsinnaanera ajornanngilaq, kingornalu taamaaliortoqarsinnaanera ajoriffissaqartinneqanngitsutut oqaatigineqaaannarluni.
Transparency: Kukkunersiuisarnermi ileqqut pingaaruteqarput
Peqquserluttuliortarnerup pinaveersaartinnissaa pillugu nunani tamalaani suliniaqatigiiffiup Tranparency Internationalip Danmarkimi immikkoortoqarfiani siulittaasoq, Knut Godfredsen, isumaqarpoq kukkunersiusarfimmik namminersortumik atuisoqarnera Naalagaaffiup kukkunersiuisuinik atuinertulli pitsaatigisoq.
- Kukkunersiuisarfiup namminersortup "kukkunersiuisarnermi ileqqoq pitsaasoq" malittuartillugu, tassalu "aningaasaqarnermi akiligassanik sianigisassat" sianiginiartuartillugit" - imatut paasillugu aannertusaarisoqarnersoq nakkutigineqartuartillugu - taava taakku kukkunersiuinerat Naalagaaffiup kukkunersiuisa suliaattulli pitsaatigissaaq.
Espersenip siunnersuutaa Knut Gotfredsenip "eqqarsaatigilluagaanngitsuunerarpaa”.
- Sunarpiaq anguniarneqarnersoq takusinnaanngivippara. Kukkunersiuisarfiimmi avataaneersut ingerlaavartumik kukkunersiuinermik suliaqartuupput, kisianni soorunami aningaasanik nuussinerit tamaasa nakkutigineq-ajorpaat. Aamma oqaatigissavara Danmarkimi Naalagaaffiup kukkunersiuisui taamaaliorneq-ajormata. Ingerlaavartumik kukkunersiuineq, suleriaatsinik misissuinermik nakkutilliinernillu imaqartoq, soorunami pingaaruteqarpoq, kisianni "kukkunersiuisarnermi ileqqumut pitsaasumut" taakku ilaareerput.
