Kukkunersiuinermut ataatsimiititaliaq: Isornartoqassappat uparuarumaarparput

Nipisattassiissutit pillugit suliami isornartorsiugassaqqissoqassappat kukkunersiuinermut ataatsimiititaliamit uparuarneqarumaarput.

Ataatsimiititaliap siulittaasua, Erik Jensen (S), taama oqarpoq.

Suliaq suliallu ingerlanera pillugu nassuiaasiornissaq ataatsimiititaliap ataatsimiinnermini kingullermi aalajangerpaa. Nassuiaat naammassineqaruni Inatsisartunut nassiunneqassaaq.

- Ataatsimiititaliaminngaanniit pingaaruteqartoq isumaqaratta, suliap qanoq ingerlasimanerani inatsisartutigut aamma ilisimatitsissummik apuussaqartariaqartugut.

AAMMA ATUARUK IA nipisattaassiissutinut suliaq pillugu: Kukkunersiuinermut ataatsimiititaliap misissuinera pingaarneruvoq

- Aammalu arlaatigut uparuaateqarsimappat, Inatsisartut tassaagamik qanoq alloriaqqittoqarnissaanik kinguneqartitsisoqarnissaanilluunniiit aalajangiisuujumaartussat, Erik Jensen oqarpoq. Tamannalu pissutigalugu ataatsimiititaliap nassuiaasiornissani aalajangerpaa.

Suliaq tassaavoq, Naalakkersuisut siulittaasuata, Kim Kielsenip (S), umiatsiaminik aalisartumut atukkiussaqarnermini nipisattassiissutinik qaffaanermut peqataagami suliamut attuumassuteqarpallaarnersoq attuumassuteqarpallaannginnersorluunniit.

Ataatsimiititaliaq suliaq pillugu Kielsenimut juunimi apeqquteqarpoq, misissuinerullu taassuma inernera Inatsisartunut pilersaarutit malillugit tunniunneqartussaavoq.

AAMMA ATUARUK Kukkunersiuinermut ataatsimiititaliamit nipisannut suliaq pillugu apeqquteqartut

Ataatsimiititaliarli suliamut nassuiaammik maanna suliaqalerpoq. Tamanna sapaatit akunnerata siuliani ataatsimiinnermini aalajangerpaa.

Nassuiaammili suut ilanngunneqassanersut Erik Jensenip oqaluttuarereerusunngilaa.

Naammassinissaanut ullumik killiliussaqanngikkaluartoq, siunissami qaninnermi naammassineqassangatinneqartoq paasissutissiissutigaa.

Kukkunersiuinermik ataatsimiititaliaq suliamik misissuisuni kisimiinngilaq. Naalakkersuisut eqqartuussissuserisoqarfik Poul Schmith naliliisereerpaat, tassanilu nipisattassiissutit qaffanneqarmata, Kielsen attuumassuteqarpallaanngitsoq nalilerneqarpoq.

AAMMA ATUARUK Eqqartuussissuserisoqarfik: Kielsen nipisattassanut suliamut attuumassuteqarpallaanngilaq

Naliliinerlu taanna oqaluuserereeritsik, Erik Jensen paasissutissiivoq.

Naliliinerulli oqaluuserineqarnera qanoq ingerlanersoq pillugu maanna oqaaseqarusunngilaq, Kielsenili misissuinissamut suliakkiussisinnaanerminik pisinnaatitaaffeqartoq oqarluni.

Ataatsimiititaliarli nammineerluni inerniliiumaartoq, oqarpoq.

Oqartussaaffiit pingasunut immikkoortiternerat eqqaasitsissutigaa, Inatsisartut Naalakkersuisullu oqartussaaffii assigiinngitsuusut innersuussutigalugu.

AAMMA ATUARUK Eqqartuussissuserisoqarfik uppernarsaasoq: Kielsen akuliuttussaanngissimanersoq misissoraa

- Tassalu uagut Inatsisartutigut inatsisillu assigiinngitsut aallaavigalugit nalilersuinissarput, nassuiaammillu suliaqarnissarput ingerlatissagatsigu. Unalu (eqqartuussissuserisoqarfiup naliliinera aaqq.) naalakkersuinermut tunngassuteqarmat uagut akuleruffigissanngilarput, Erik Jensen oqarpoq.

Taanna Siumumi siulittaasunngorniunnermi Kim Kielsenimut unammillertaavoq.

Tamannali kukkunersiuinermut ataatsimiititaliap siulittaasuatut sulineranut sunniuteqarnavianngitsoq oqarpoq. Inatsisilerituut misissuereersut atuuffiinullu akerliunngitsut taassuma oqaatigaa.