Allagaatit kalaallisuunngortinneqarneri tiguneqartinnagit imarisai pillugit ataatsimiititaliamit isummersinnaaneq naatsorsuutigineqanngitsoq, Erik Jensen tusagassiuutinut nalunaarummi oqarpoq.Assi: KNR

Kukkunersiuinermut ataatsimiititaliap nipisattassiissutit pillugit allagaatit pissarsiarai

Ataatsimiititaliap allagaatit maanna misissuiffigissavai. Tamanna piffissamik atuiffiulaassasoq, Kukkunersiuinermut ataatsimiititaliap siulittaasuata nalilerpaa.

Kukkunersiuinermut ataatsimiititaliap nipisattassiissutinut atatillugu suliami atortussat ujartorneqartut Naalakkersuisunit tiguai.

Kukkunersiuinermut ataatsimiitaliap siulittaasua, Erik Jensen (Siumut) tusagassiuutinut taama paasissutissiivoq.

- Atortussat annertoorujussuit suli kalaallisuunngortillugit nutserneqanngimmata danskisuunngorlugit nassiunneqarallartut matumani pineqarput, Erik Jensen oqarpoq.

Allagaatit isertuussat oqallinnerup ilarujussuani maannamut oqallisigineqarsimapput.

AAMMA ATUARUK Vivian Motzfeldt Kimimut tatiginnikkunnaarnissaq pillugu: Taamaammat isumaga allanngorpoq

Nipisattassiissutinut suliaq Inatsisartuni sisamanngornermi ualikkumit unnuup tungaanut sakkortuumik oqallisigineqarmata illuatungiliuttut Naalakkersuisut siulittaasuannut, Kim Kielsenimut (Siumut) ataatsimoorlutik tatiginnikkunnaarlutik nalunaaruteqarput.

Nipisattassiissutinut suliaq pillugu naatsumik:

 

Nipisattassiissut siorna aalisarneqanngitsut 204 tonsit 2020-mut nuutsinnissaat Naalakkersuisut maajip ulluisa aqqaneq-aappaanni aalajangerpaat.


Kalaallit Nunaanni Aalisarnermut Nakkutilliisoqarfiup paasissutisiinera naapertorlugu ammaasseqqinneq politikkikkut aalajangerneruvoq.


Imartani Paamiut avannaaniit Kangerlussuaq tikillugu nipisanniarusuttunut nipisanniartoqarsinnaajunnaartoq, sapaatit akunneranni kingullermi nalunaarutigineqaraluarpoq.

 

IA: Kim attuumassuteqarpallaarpa?

Inuit Ataqatigiit suliaq pillugu avammut nalunaaruteqaqqaarput.


Kim Kielsen umiatsiaminik aalisartumut atukkiussereerluni Naalakkersuisuni nipisattassiissutinik qaffaaqataagami imminut iluaqutissinnersoq pillugu apeqquteqarniarlutik nalunaaruteqaramik taamaattoqarpoq.
 

Kim Kielsen Naalakkersuisut ataatsimiinnerannut peqataavoq, attuumassuseqarsinnaallunilu paasissutissiissutiginagu.

 

Kukkunersiuinermut ataatsimiititaliaq sakkortuumik uparuaasoq

Inatsisartut Kukkunersiuinermut ataatsimiititaliaa tamatuma kingorna suliamut atatillugu nalunaajaanerminik tunniussaqarpoq.

 

Ataatsimiititaliallu matumani "sakkortuumik uparuaaneq" atorpaa pissutsillu "isornarluinnartutut" erseqqissaatigalugit.

 

- Ataatsimiititaliap sakkortuumik uparuaavoq Inatsisartullu Naalakkersuisut siulittaasuata suliami matumani attuumassuteqarpallaarnissamut apeqqut eqqumaffigisimanngikkaa malugeqqullugu.

 

Oqaaseqaatit taakku ataatsimiitaliap naliliinermi oqaaseqaataata allattorsimaffiani qaffasinnerpaamik sakkortunerpaamillu inissisimapput.

Kukkunersiuinermut ataatsimiititaliap allagaatinik amigaataasunik tigusaqarsimannginnera ilaatigut pissutigalugu illuatungiliuttut taamaaliorput. Taamaammat illuatungiliuttut Naalakkersuisut Kukkunersiuinermut ataatsimiititaliamut allagaatinik isertuussiniarsoraat.

Tatiginnikkunnaarnermik taasinissaq ikinnerussuteqarfiusoq

Suliffiup iluani allakkat Eqqartuussissuserisullu suliffeqarfiannut Poul Schmidtimut allakkat Kukkunersiuinermut ataatsimiititaliap pissarsiarisimanngisai pineqarput. Eqqartuussissusersisut suliffeqarfiata nipisattassiissutinut suliaq Kukkunersiuinermut ataatsimiititaliatulli misissuiffinikuuaa.

Allakkani qanoq allassimasoqarnersoq ilisimaneqanngilaq.

Kim Kielsenimut tatiginnikkunnaarnermik taasiniarneq ikinnerussuteqalaarnermi qaangerneqarpoq: 14-inik tatiginnikkunnaarnianngitsut 13-it tatiginnikkunnaarput marlullu taasinatik.

AAMMA ATUARUK Siumumit marluk Kielsenimut tatiginnikkunnaarnissamik taaseqataanngitsut

Siumumi ilaasortat marluk taaseqataanngitsuupput. Taakku allagaatit amigaataasut utaqqeqqaarniarpaat.

Sisamanngornermi unnukkut oqallinneq Inatsisartut siulittaasoqarfiata allagaatit tunniunneqarnissaannik nalunaaruteqarneranik inerneqarpoq.

Allagarpassuit - danskisuinnaq allassimasut

Allagaatit maanna tunniunneqarput, atuagassallu annertoorujussuusut danskisuinnarlu allassimasut, ataatsimiititaliap siulittaasua, Erik Jensen oqarpoq.

- Atortussat misissorneqarnissaannut ataatsimiititaliap suli piffissaqanngilaq, minnerunngitsumik nalilersussallugu tamanna naammaginarnersoq, tamanna piffissami aggersumi pissaaq. Ataatsimiititaliamit kalaallisuunngortinneqarneri tiguneqartinnagit imarisai pillugit isummersinnaaneq naatsorsuutigineqanngilaq, Erik Jensen tusagassiuutinut nalunaarummi oqarpoq.

Partiimi siulittaasut tamarmik maanna nalunaaqutaq ataatsip tungaanut ataatsimiipput.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat