Kukkunersiuinermut ataatsimiititaliap misissuisitsinera ingerlaannassaaq
Inatsisartut ukiakkut ataatsimiinnerat taamaatiinnarneqarpoq. Aamma oqaluuserisassatut siunnersuutit tamarluinnaasa, soorlu inatsisissatut siunnersuutit, isumaliuutissiissutit aammalu apeqquteqaatit aallaavigalugit oqallinnissat taamaatiinnarneqarput, kissaatigineqassappalli, Inatsisartut nutaat inissitsiteriarpata nanginneqarsinnaassallutik, Inatsisartut Siulittaasoqarfiata tusagassiorfinnut nalunaarutaani tamanna atuarneqarsinnaavoq.
Ataatsimiititaliani suliat tamaasa aamma unitsikkallarneqarput
Aningaasaqarnermut Akileraartarnermullu ataatsimiititaliamut tunngatillugu pissutsit immikkut ittut atuupput, tassa aningaasaliissuteqarnissamik suliassat politikkimut tunngasumik imaqanngitsut kisiisa ataatsimiititaliamit suliarineqarsinnaapput, taakku inuiaqatigiit ingerlanneqarnerat eqqarsaatigalugu kinguartinneqarsinnaanngippata,
tamannalu ataatsimiititaliami tamarmiusumit isumaqatigineqarpat.
§ 37 naapertorlugu apeqquteqaatit qinersinerup nalunaarutigineqarnerata kingorna akissuteqarfigineqarnissaat
naatsorsuutigineqarsinnaassanngilaq. Taakkununnga aamma ilaapput apeqqutit qinersinissap nalunaarutigineqarnera sioqqullugu apeqqutigineqarsimasut.
Qulaajaatitsineq ingerlaannassaaq
Kukkunersiuinermulli ataatsimiititalip immikkut ittumik misissuisitsinera, ilaatigut Naalakkersuisunut siulittaasuusimasup Aleqa Hammondip nunatta karsiata aningaasaataanik atornerluisimaneranut tunngassuteqartoq ingerlaannassaaq.
Misissuinermi paasisat qinersinerup kingorna Kukkunersiuinermut Ataatsimiititaliamut nutaamut saqqummiunneqarumaarput, 2013-imut Nunatta Karsiata Naatsorsuutai pillugit isumaliutissiissuteqarnissaq eqqarsaatigalugu, Inatsisartut Siulittaasoqarfiat tusagassiorfinnut nalunaateqarluni taama allappoq.
