Kukkuluttortoqarneratigut ilagiit katuullit akiliisariaaruttut

Canadami atuarfinni nerisaqarfiullutillu ineqarfiusuni atuartuusimasut taarsiivigineqarnissaannut suliaq mamianartuliatut maanna nalilerneqarpoq.

Naggueqatigiit Inuit, indianerit metisillu meerartaat atuarfinni pineqartuni naalliutsinneqartarsimanertik pillugu Canadami naalakkersuisunit taarsiivigineqarnissaminnut pisinnaatitaaffeqarput, soorlu aamma upperisarsioqatigiit atuarfinnik ingerlatsisarsimasut taarsiinissaat piumasarineqarsinnaasoq.

Aningaasat ilaat saammaateqatigiittoqarnissaanut sulinermut atorneqassapput. Aningaasat amerlanersaat tunniunneqareerput, inatsisitigulli ilaatigut kukkuluttortoqarneratigut ilagiit katuullit aningaasat sinnerinik 25 millionit dollarinik, imaluunniit 130 millionit koruunit missaannik akiliisariaqassanngillat.

Siunertarineqanngitsumik aalajangiisimanera pissutaavoq

Canadami nunap immikkoortuani Saskatchewanimi eqqartuussiviit ilaata siunertarineqanngitsumik aalajangiisimanera pissutaalluni ilagiit katuullit akiliisariaqassanngillat. Canadami naalakkersuisut ilagiit katuullillu akornanni isumaqatigiissut suli isertuussaavoq, assingali tusagassiuutinut kalerriutigineqarsimalluni. Canadami siornatigut naalakkersuisuusimasut konservatiivit ilagiit katuullillu isumaqatigiissusiortuupput.

Nunalli inoqqaavisa siuttuisa eqqartuussivitsigut aalajangiineq suliareqqitassanngortinniarpaat, allaallumi Paavi Francisimut aamma ingerlateqqinnialersaarlugu.

Aamma atuaruk Canada: Atuarfiit tusaamanerlutaasut pillugit misissuisoqaqqilersoq

Ilagiit katuullit oqaluffiisa ilaat saammaateqatigiittoqarnissaa pillugu namminneq suliaqareerput, ilagiilli katuullit aningaasat sinneri 130 millionit koruunit missaat taarsiissutiginiarunanngilaat.

Canadami aviisit annerit ilaata Globe and Mailip suliaq sapaatip-akunnerini kingullerni marlunni misissuiffigisimavaa, mamianartuliarlu Canadami innuttaasunit tupaallaatigineqaqaaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat