Kukkukuuaqqat nerineqarsinnaapput
Timmissat nappaataat toqunartoq Europa-mut sukkasuumik siuaruaakkiartoraluartoq, kukkukuuaqqat igaassatut pisiarineqartartut nerineqarsinnaalluarput.
Kukkukuuaraliornermi igaffimmi eqqiluisaaraanni timmissat nappaataannik toqunartumik tunillatsinnissaq aarlerinaatissaqanngilaq. Taama oqarpoq Inuussutissanut aqutsisoqarfimmi nersutinut nakorsaaneq Preben Willeberg.
-Kukkukuuarartorneq uloriananngilaq. Timmissat nappaataat suli Danmarkimut anngutinngilaq, anngukkaluarpallu kukkukuuarartornissaq pisarnertut iganermi eqqiluisaaraanni ulorianaateqarnavianngilaq,
Iganermi mianersuutigisariaqarpoq kukkukuuaqqap aava erlaviilu naatitanut, agguivimmut, erruummullu attuutinnginnissaat. Kukkukuuaqqallu uulluarsimanissaa aamma pisariaqarpoq, soorlu salmonella eqqarsaatigalugu aamma taamaliortartugut.
-Virusi kissamut malussarissorujussuuvoq. Neqimi viruseqassagaluarpat tamarmik iganermi toqunneqassapput, Preben Willeberg oqarpoq.
