Kujataata oqaluttuassartaa saqqummiunneqassaaq

Finn Lynge Narsameersoq, Svenskit kunngikkormiuisa ilisimatuussutsikkut ataatsimiittartoqatigiviisa ataatsimiinnissaanut, aqagu aallartittussamut peqataanermini kujataata oqaluttuarsartaa saqqummiutissavaa.

Siunnersuutigisimavara kulturikkut naapeqatigiittarnerit kujataata oqaluttuassartaani pingaarutillit saqqummiutissallugit. Tassa kujataani, massakkut Narsap kommunianik taaneqartartup oqaluttuassartaa immikkuullarilluinnarami. Taamanersuaq 1400-kkunni qallunaatsiaat maaniikkallarmata, tamannalu qaqortukuluup oqaluttuassartaanit aamma Narsap iluani oqaluffiusimasumit nalunngilavut. Aammalu kangerluup illuatungaani nunaqarfiusimasut marluk assanneqarnerisa takutippaat qallunaatsiaat aamma piffissami tassani tamaaniissimasut. Tassalu naapiffik siulleq. Naggueqatigiit inuit nunarsuup illuatungaaninngaanniit Kalaallit Nunaannut pipput, qallunaatsiaallu illuatungaaniit takkullutik. Tassalu naapiffik siulleq, Christopher Columbus ilisimasassarsiortarnerillu annertuut allat pinngikkallarmatali, inuit nunarsuaq kaajallallugu naapeqatigeeqqaarfiat, tassa mannarpiaavoq. Tamannalu immikkuullarilluinnarpoq, tamannalu aamma pineqarpoq.

Kangerluk manna qeqertallu eqqaaniittut Illutalik, Tuttutooq mannalu Narsaq aamma Narsap ilua, tassa tamaani naapipput.

Ataatsimiinneq aqagu aallartittussaq juunip ulluisa 30-ani naammassineqarpat, svenskit kunngiat Carl Gustav 16-iat tusagassiortunik katersortitsilluni naggasiissaaq.