Kujataanut attaveqaatit suli ajorput

Nalunaarasuartaaserivik TELE Greenland nalunaarpoq kujataani Kalaallit Nunaata Radiaonit TV-kut radiokkullu aallakaatitat suli tusaaneqarsinnaanngikkallartut. Pisinermilu tigutsisit attaveqannginneq pissutaalluni atorsinnaanngillat.

Tele Greenlandimit teknikerit sakkortusaavimmut Nuup Qeqertarsuatsiaallu akornaniittumut S-61-mut ilaallutik ullaap-tungaa aallarsimagaluarput, akunnerillu pingasut timmereerlutik nittaattuarmat nunnissinnaannginnamik Nuummut utiinnartariaqarsimapput. Silalu aqagu pitsaanerussappat iluarsaajartortoqassaasoq Tele Greenlandimi tusagassiisartoq Malînánguaq M. Mølgaard nalunaarpoq.

Kalaallit Nunaata Radioata radiokkut TV-kullu aallakaatitaasa isiginnaarneqarsinnaannginnerisa saniatigut Internetimut mobilinullu attaveqaatit aamma atorsinnaanngillat. Tigutsisit dankortit, Visat Akiliutillu aamma Paamiuniit kujammut atorsinnaanngillat. KNI-lli pisortaanerata Gerhart Petersenip oqaatigaa kujataani pisiniartartut niiverniarniarunik fluesmækkeri atortariaqassagaat.