Kujataaniit Islandimut timmisartuussisalernissaq suli akineqanngilaq

Islandimut aasaanerani timmisartuussisalernissaq pillugu akissutisinissaminnut Kujataani suli utaqqipput.

Ukiunimi pingasuni isumaqatigiissut ukioq manna naasussaavoq.

Pilersaarutit Attaveqatigiinnermut Pisortaqarfimmiit sivisuumik suliarineqareerput.

Naalakkersuisunut ilaasortaq, Jens Napaattooq, majip aalllartilaarnerani oqarpoq, timmisartuussisarnissamut tunngassuteqartut maaji naatinnagu aalajangiiffigineqarnissaat ilimagalugu. Taamaattoqanngilarli.

Jens Napaattuumut siullermik apeqqutigaarput, nammineq pitsaanerusumik qanoq iliuuseqarsimasinnaanersoq, akivorlu, naatsumik oqaatigalugu oqartoqarsinnaasoq, Islandimut timmisartuussisarnissaq atassuteqarnissarlu pingaarutilerujussuusoq.

Jens Napaattooq ullumi oqarpoq, aalajangiinissaq piariiliivissoq, siunnersuullu Naalakkersuisunut pingasunngorpat saqqumiunneqartussaasoq suliarineqarlunilu, taannalu naalakkersuisunit akuerineqareerpat, taava Aningaasaqarnermut Ataatsimiititaliamut ingerlanneqassasoq, taakkulu akuersereernerata kingorna avammut saqqummiussinnaalissagitsik.

Jens Napaattooq aamma oqarpoq, suliarineqarneranut taama sivisutigisumik utaqqinermut pissutaasoq ukiunut tallimanut isumaqatigiissuteqarsimaneq.

Isumaqatigiissutit siullermik ukiuni pingasuni atuuttarsimapput.