Kujataani uumasunut nakorsaqanngilaq
Inatsisartuni ilaasortaq, Finn Karlsen, Siumut, Kujataani uumasuuteqarnermik ingerlatsiffiusumi aalajangersimasumik uumasut nakorsaqannginnera, Naalakkersuisunit qanoq iliuuseqarfigineqassanersoq, paragraf 37 najoqqutaralugu Naalakkersuisunut apeqquteqarpoq.
Finn Karlsen apeqquteqateqarnermini ima tunngavilersuivoq.
Kujataani uumasuuteqarfiusumi, uumasut nakorsaanik 'piareersimasumik' ukiorpassuarni atorfeqartitsisoqarnikuuvoq, Naalakkersuisullu siulissi tamanna allanngortinnikuuaat atorfeqartitsineq unitsillugu. Isumaqarpunga aarlerinartoqartoq uumasuuteqarluni inuussutissarsiuteqarfiusumi uumasunut nakorsaarutsitsisimaneq, tassami sukkulluuniit uumasuutilinnit uumasunut nakorsaqarnissaa pisariaqartinneqartuaannarmat, Finn Karlsen taama tunngavilersuivoq.
Ukiaanerani savanik toqoraaneq sioqqullugu, savat savaaqallu katillugit 40-50.000 missaanniittarput, tamakkulu saniatigut nersussuit, hestit allallu amerliartuinnarlutik, Finn Karlsen apeqquteqaatiminut atatillugu taama naggasiivoq.
