Assi: aajo

Kujataani tunillanneqarsimasut sisamat paasineqartut

Kujataani inuit sisamat tunillanneqarsimapput. Taakkunannga pingasut ersiuteqarlutik angerlarsimaannarput.

Nunatsinni tunillanneqarsimasut sisamanik amerlipput. Kujataani sisamat tunillanneqarsimasut misissuinerit takutippaat. Tunillatsittut pingasut Qaqortumiipput ataaserlu Narsarsuarmiilluni. 

Tunillatsissimasut pingasut tunillatsereersimasutut ilisimaneqartumut attaveqarsimasut, pisortat nalunaarutigaat. Tassalu ersiuteqarsinnaanermik eqqumaffigineqareersimallutik tunillatsissimaratarsinnaanerallu ilisimareersimallugu. 

Taakku massakkut ersiuteqarlutik angerlarsimaannarput. 

- Paasineqartoq kingulliup, tassa sisamaata, kikkut attavigisimanerai suli ilisimaqqissaarneqanngilaq, maannali misissuineq aallartereerpoq, taassuma sumiissimanera kikkullu naapissimaraa suli inissinneqarsimanngimmat. Politiit nakorsaaneqarfik peqatigalugu tunillaassuussimanermik misissuisut, pisortat allapput. 

Nunatsinni tunillatsissimasut maanna 18-upput. Ilulissani ataaseq, Sisimiuni arfinillit, Nuummi ataaseq, Narsarsuarmi marluk, Narsami ataaseq, Qaqortumi arfineq marluk.

Sisimiuni coronavirusimut tunillatsissimanermut misissuiffigineqartut siulliit tunillatsissimanngitsut Qeqqata Kommuniata Facebookimi quppernermini allaaseraa. Sisimiuni coronavirusimik tunillatsissimasut arfiniliupput, taakkulu ilaqqissimanngitsut misissuinerit takutippaat.

Tuniluunneq suli misissorneqartoq, misissortinnerillu tullii ataasinngorpat juulip 19-iani pissasut kommunip ilanngullugu Facebookimi quppernermini allaaseraa.

Tunillatsittut amerlisimannginnerisa kingorna utoqqaat angerlarsimaffiannut Qupanummut pulaarsinnaaneq ammaanneqaqqippoq. Ilaquttalli qaninnerpaat qanermut assiaquteqarlutik kisimik pulaarsinnaasut erseqqissaatigineqarluni.

Isummersuutit

Nunatsinni coronavirusi pillugu
killiffik

Tunillatseqqasut 63  
Siullermik kapitissimasut 36.921  
Aappassaa kapitissimasut 26.924  
Misissorneqareersimasut 42.668  
Tunillanneqarsimasut 150  
Peqqisseqqittut 87  
Uninngasut 0  
Anersaartuuteqartitaasut 0  
Toqquteqartut 0  
nun.gl-imi titartaganngorlugit:
Kapitissimasut | Tunillatsissimasut
 
   Nutarterneqarpoq: 
Augustip 5-at 2021 nal. 10:45
 

Coronavirusimik tunillatsinissaq pinaveersaaruk