Kujataani tigusaasut arlaqarput

juulip 18-at 2006 06:35

Aasap ingerlanerani ikiaroornartumik hash-imik eqqussuiniartarneq annertusisarpoq. Tamanna kujataani politeeqarfinnit malugineqarpoq, qimmit ikiaroornartunik naamasinnaasut ikiorsiullugit tigusarinninnerit arlallit pimmata. Taama AG allaaserisaqarpoq.

Angut kalaaleq ikiaroornartuerniutaagunavissunik aningaasarpassuarnik 50.000 koruuninik timimini toqqortaqartoq, nunatsinniit aallalersoq politiit tigusaraat, Narsami stationslederi Ib Lennert Olsen oqarpoq.

Aamma arnaq kalaaleq alla, 36-inik ukiulik Danmarkimi maannakkut najugaqartoq, danmarkimiit nunatsinnukartilluni hash-imik 136 gram-imik, usuup puuanik poorlugu iluminut toqqorlugu eqqusseriaraluarpoq. Qimmit ikiaroornartunik naasinnaasut, danmarkimi timmisartorsuarmi misissuitillutik, arnaq nunatsinnut eqqusseriaraluartoq naamasinnaasimavaat. Arnaq taanna 6.560 koruuninik akiligassinneqarpoq.

Angut alla 38-inik ukiulik hash-imik 158 gram-imik eqqusseriaraluartoq aamma 6320 koruuninik akiligassinneqartoq, arnaq 50-inik ukiulik, Narsarsuarmut tikitsilluni hash-imik 3 gram-imik nassatalik paasineqarmat, 500 koruuninik aamma akiligasinneqarpoq.