VIDEO Kujataani teriannissat perlerortut ajornartorsiutigineqartut
Kujataani teriannissat perlerortut ajornartorsiutaammata siorna decembarip qaammataani teriannissat pamiuisa akii Kommune Kujallermit qaffaavigineqarput.
Allattoq Kassaaluk Kristiansen
Nutserisoq Marie-Kathrine Barlaj Lyberth
Teriannissat pamiui 200 koruuninit 300 koruuninut qaffaavigineqarput. Akinillu qaffaareernermit maannamut teriannissat pamiui katillugit 223-t Kommune Kujallermut tunineqarsimallutik.
Pamiorli ataaseq suli akisunerisinnaagaluartoq, Kangerluani savaatilik isumaqarpoq:
- Akisunerulaarsinnaagaluarpulluunniit, savaaqqanut naleqartaqimmata terianniakasiit upernaakkut. Uanga taama isumaqartaraluarpunga, kisianni ajunngilaq 300-mut inisseqqikkamikku, Aka Motzfeldt KNR-imut oqarpoq nangillunilu:
- 200-mut apparmassuk piniarpiarunnaarnikuunnguatsiaraluaramikkit, amerlatsipiloorujussuunguatsiaramik taamasillutik.
Teriannissat pamiui Kommune Kujallermit pisiarineqareeraangata perlerornerat peqqutigalugu ingerlaannaq ikuallanneqartarput.