Kujataani tb-mik misissuileruttorput
Nappaatip sakialluutip nuna tamakkerlugu akiorniarneqarnerani qinnguartaaneq suliniutinut ilaavoq, misissuinermilu assilisat Nuummut nassiunneqartarput, nakorsamillu tassani nalilersorneqartarlutik.
Misissuinermi inernerit innuttaasut qaqugu pisinnaavaat?
- Assilisat Nuummi nalilersorneqassapput, sivisunerpaamilli sapaatip-akunnerini pingasuni sisamaniluunniit utaqqisariaqarnissartik inuit naatsorsuutigissavaat, arlaannik pasinartoqassappat kalerriisoqarumaarluni, peqqissaasoq Helga Petersen oqarpoq, nangipporlu:
- Misissuineq una iluatinnaqimmat inuit ornigulluarnissaat kissaatigaarput. Sakialluutip akiorniarneqarnerani suleqatigiilluarneq pingaaruteqarmat, Helga Petersen taama oqarpoq.
Umiarsuup nunaqarfinnut ataasiakkaanut ullut tikiffissai KNR-TV-p allagarsiiviatigut takuneqarsinnaassapput, nalunaaqutarlu tikiffissaq nunaqarfinni ataasiakkaani allagartaliinikkut ilisimatitsissutigineqartarumaarpoq.
