Kujataani takornarialerisut amerlanerusut suleqatigiilerput

novembarip 07-at 2004 19:38

Kujataani takornariartitsivik Destination South Greenland immikkut ittumik tallimanngormat ataatsimeersuarmat nutaanik siulersuisortaarpoq, siulittaasunngorporlu tuttuutilik Steffen Magnusson.

Ingerlatseqatigiiffimmi piginneqataasut namminersortunik arfineq-pingasunik ilammata immikkut ittumik ataatsimeersuartoqarpoq, piginneqataalersullu ilaatigut tassaapput, Narsarsuaq Blue Ice Explorer, Narsami takornariartitsivik, Isortoq Outfitters, Hotel Kap Farvel aamma Sulisartut Højskoleat.

Destination South Greenland takornarianut pilerisaarutinik siammarterinermi saniatigut  namminersortunngorsarneqassaaq, aammali suleqatigiinnikkut akinik ilisimaarinninnerulluni suliniuteqartalernissaq siunniunneqarpoq.

Taakku saniatigut anguniagassat pingaarnerit ilagaat angallannikkut nutaamik aaqqissuusseqqinnissamut pisortanut siunnersuuteqarsinnaanissaq.

- Tamannali kingusinnerusukkut aatsaat pisinnaassaaq, aatsaat aallarnisaleratta. Siulittaasoq Steffen Magnusson oqarpoq.