Kujataani sinersortaatit angalanerat ukiortaamiit nalorninartorsiorpoq

oktobarip 18-at 2005 10:37

Kujataani imaatigut ilaasunik angallassineq sinersortaatit allat assigalugit ukiortaamiit nalorninartorsiorpoq. Kisianni ajonarnartorsiutip qaanngerneqarnissaa neriunartoqartoq, kujataani borgmesterit ilaat oqarpoq.

Arctic Umiaq Line-p kujataani ilaasunik angallasisartui marluusut Aviaq aamma Aleqa Ittuup januaarimiit angallassinitik unitsittussaaavaat. Taakku Qaqortumiit Nunap Isuata eqqaa tamaat tikillugu angalasarput.

Nanortallip Kommuniani kommunalbestyrelsimi ilaasortat ilaat, Thomas Ezekiassen, Atassut, maanna ernumalluni utaqqikatalluinnarnerarpoq. Taanna oqarpoq, angallassinerup qanoq pineqarnissaanik nipangersimasoqarpallaalersoq.

- Tupinnanngilaq taama tusarusukkatta, qaammatimmi marluk sinnilaaginnarlugit qaangiuppata januaarip aallaqqaataa tikissavarput. Nunatta kujataani imaatigut angallanneq taamatullu aamma timmisartukkut angallannerup allanngortinneqassappat allanngortinneqarnissaa, qanoq aaqqinneqassanersoq sioqqullugu paaserusupparput. Tassami allatulli angallannermi ilaagatta.

Nanortalimmi kommunalbestyrelsimi ilaasortaq Thomas Ezekiassen, Atassut, taama oqarpoq.

-Kujataani kommunit pingasut suleqatigiit, tassaasut Nanortalik, Qaqortoq Narsarlu, saaffiginnissuteqareersullu, Arctic Umiaq Line-p Aleqa aamma Aviaq Ittuup kujataani angallassinerata unitsinnissaa kinguartippaat januaarip 31- iata tungaanut angalasussanngorlugit, taama oqarpoq Qaqortup borgmesteria Simon Simonsen.

-Kujataamioqatigiit oktobarimi ataatsimikkatta, Inuussutissarsiornermi siunnersortit pisortaat piumaffigaavut, kujataani angallassineq namminersortunit ingerlanneqalersinnaanersoq misissuiffigeqqullugu. Taamaattoqarsinnaappat kujataani kommunit pingasut piginneqataalinngikkaluarlutik qanoq iliorlutik ikiuuteqataasinnaanersut ilanngullugu misissuiffigeqquarput. Immaqa kiffartuussinernik imalinnik isumaqatigiissusiornikkut, Simon Simonsen oqarpoq.

Upperinerarpaalu januaarip 31-iat tikitsinnagu ajornartorsiutip qaangerneqarnissaa.

-Ilungersorluta ulluni makkunarnerpiaq iluarsiissutissanik nassaarniarpugut, Simon Simonsen oqarpoq.