Kujataani savat qernertunik tingoqartarnerat pillugu innuttaasunut ataatsimiititsinerit

Kujataani savat qernertumik tingoqarsinnaasarnerat pillugu misissuineq februaarimi naammassineqarpoq.

Tinguit qernertut takussaavallaarnerat, Kuannersuarnit mingutsitsinermit pissuteqarsoralugu siornatigut ernummatigineqartarpoq.

Ilisimatuulli misissuinerannit, ilisimatuut Göteborgimi, Aarhusimi Københavnillu universitetianeersut suleqatigalugit suliarineqartumi, mingutsitsinerup pissutaannginnera paasinarsivoq.

Savalli uummatai tinguilu qinngornernit ulorianartunit mingutsitsinermit sunnigaannginnerat misissuinerup takutippaa. Assigiinngitsunillu akoqassuseqarnerat assigiinngissuteqanngitsoq aama paasineqarpoq.

- Akoqassusaannik uuttortaanerup pissusissamisoortunik tunuliaqutaqarneranik aatsitassarsiornerminngaanniillu mingutsinneqannginneranik takutitsivoq, naalakkersuisut tusagassiuutinut februaarimi nalunaarutiminni allapput.

Kujataani innuttaasunut ataatsimiisitsineq

Ilisimatusarnerup inernera pillugu kujataani innuttaasunik sapaatip-akunnerani matumani pingasunngornermi sisamanngornermilu ataatsimiititsisoqassaaq.

Siullermik Qaqortup Katersortarfiani nalunaaqutaq 15.30-mit 18.00-p tungaanut,  Narsamilu Inuilimi aqaguani ullup taamaalinerani.

Taama paasissutissiivoq Violeta Hansen, Göteborgip Universitetiani ilisimatuutut misissuisartoq, nakorsaatitigut ilisimatusarnermi qinngornernik misissueqqissaartarnermik tassani sammisaqartoq.

- Kalaallit Nunaanni uumasunut nakorsaq inuussutissanullu oqartussaasut suleqatigalugit ataatsimiititsivugut, Violeta Hansen oqarpoq.

- Ilisimatusarnitsinni paasisatta inuiaqatigiinnut anngunneqarnissaat pingaaruteqarpoq.