Kujataani piiaavissaq 80-inik suliffissaqartitsilissaaq

Sapaatip akunnerata naanerani Naalakkersuisut uraanitalinnik aatsitassarsiortoqannginnissaanik aalajangersakkap atuutsiinnarnissaanik aalajangiinerannut atatillugu, Kuannersuarnut tunngatillugu pilersaarutit unitsinneqarallassagunarput, tamatumalu peqatigisaanik Naalakkersuisut Killavaanni Narsap Qaqortullu akornanniittumi Eudialyt-imik piiaasoqalersinnaanera isumalluarfigaat.

Siumumeersup Akitsinnguaq Olsenip § 36 najoqqutaralugu apeqqutaanut, suliffissuaqarnermut aatsitassarsiornermullu naalakkersuisup Ove Karl Berthelsenip akissutaani tamanna atuarneqarsinnaavoq.

Akitsinnguaq Olsen Kujataani paasisassarsiorluni angalareerluni ilaatigut aperivoq, Naalakkersuisut Kujataani suliffissanik nutaanik pilersitsinissamik pilersaaruteqarsoralugit.

Ove Karl Berthelsen akissuteqaammini allappoq Killavaanni Eudalyt-imik piiaasinnaanissamut pilersaarummut tunngatillugu imminut akilersinnaanissaanik misissuinerit 2010 naatinnagu naammassineqassasut.

Akilersinnaassutsimik misissuinerit ajunngitsumik inerneqassappata, aatsitassarsiorfissamik sanaartornerit 2011-mi aallartinneqarsinnaassapput, ukiullu tulliani piiaaneq aallartinneqarsinnaassalluni.

Ove Karl Berthelsenip naatsorsuutigaa, aatsitassarsiorfimmi 80-it sulisorineqarsinnaassasut. Tamatumalu saniatigut suliffiit allat pilersinneqarsinnaassallutik.

Tamatumunnga peqatigitillugu ilaatigut Sisimiuni aatsitassarsiornermut ilinniarfimmi ilinniartitsinerup kinguneranik taqqavani najugaqartut suliffissaqarluarsinnaalernissaat, Naalakkersuisunut ilaasortap Akitsinnguaq Olsenimut akissummini oqaatigaa.