Kujataani nunaqarfiit siuarsarneqalerput
Kommune Kujallermi inuussutissarsiornermut ataatsimiititaliami siulittaasoq, Kalistat Lund, upperissagaanni, nutaamik periuseqalerneq angusaqarfiulluassaaq. Ammassivimmi tunitsivik ammaqqinneqarsimalersoq, aalisakkanillu panertiterisoqalereersoq, Kalistat Lund oqarpoq. Aappilattumi panertitsiviliortoqareersimavoq.
Eqalugaarsuit suliaqarfiusussatut tullinnguuppoq. Tassani tunitssivik tiguneqaqqammerpoq, saarullinnillu januaarimi tunisisoqartalernissaa naatsorsuutigineqarpoq, upernarpallu nipisat suaat tigoorarneqarsinnaalissapput. Tasiusami tunisassiorfitoqqap attartorsinnaanera isumaqatiginninniassutigineqarpoq. Tassani aalisakkanik tunisisoqartarnissaa siunertaavoq, aammalumi marmelademik tunisassiulersinnaaneq, kiisalu nunap sinneranut tunisassiassanik paarnanik qeriterisinnaaneq, siunertaapput. Tamanna aallarniutaannaavoq, Kalistat Lund oqarpoq.
- Kujataata inuussutissatigut qitiusunngortinnissaa, aamma inuussutissalinerup iluani suliassanik tigusinissaq, naalakkersuinikkut anguniarparput,oqarpoq. Kommunillu nunaqarfinnut aningaasaliissuteqarnissamik suliniuteqarsimanera, aamma nunaqarfinnut siunnersortimik atorfinitsitsisimanera, piviusumik angusaqarfiusoq erseqqissaatigaa.