Kujataani meeqqerivinni sulisut ikilissapput

Kujataani kommunit kattuppata meeqqerivinni meeraaqqerivinnilu sulisut assigiimmik pinnikkusunnerup aqqani ikilisarneqassapput
marsip 18-at 2008 13:49

Nanortalimmi meeqqerivimmi meeraaqqerivimmilu sulisut siunissami kommunit kattuppata ulapinnerusalissapput. Pissutaavoq kommunit kattuppata sulisut amerlassussaasa tulluussarneqalernissaat:

Nanortalimmi meeraaqqerivimmi meeraaqqat iloqissiorluarlutik pinnguarrapput. Massakkorpiaq meeraaqqat 20-t tallimanik sulisoqartinneqarput, kujataanili kommunit kattuppata sulisut ikiliumaartut qularineqanngilaq. Pissutaasoq tassaavoq kujataani kommuninngortussami kiffartuussinerup tulluussarneqarnissaa sumiiffinni tamani assigiinnerusunngorlugu. Nanortalimmi meeqqerivik kujataani tamarmi allanut naleqqiullugu sulisoqarnersaavoq, allanngortussaassaarli assigiimmik pinnikkusunnerup aqqani.

Nanortalimmi meeraaqqeriviup ningiua Thilda Thomsen radioavisimut oqarpoq meeqqerivinni meeraaqqerivinnilu sulisut amerlassusaannik tulluussaanerup kingorna sulisut puullaaqisut meeqqanut piffissaqarpianngitsut sulisorineqalissasut.