Kujataani meeqqat TB-mik tunillatsianerupput
- Kujataani najugaqaraanni Kitaani allami najugaqarnerminngarnit tunillatsinnissaq annertunerujussuuvoq Tunumiikkaannilu Kitaaniinnerminngarnit tunillatsinnissaq annertunerulluni, taama oqarpoq nakorsaq Bolette Søborg Statens Seruministituttimeersoq.
Doktorinngorniuteqarnermini kalaallit meeqqat kujataamiut, tunumiut kitaamiullu 2.200-t tuberkuloseqarnersut misissorsimavai, taakkua Kalaallit Nunaanni meeqqanit tamarmiusunit 25 procentit missaanniipput.
Misissuinermi meeqqat tuberkulosemik tunillatsissinnaanerat pineqarpoq, Kujataanilu illoqarfiit ilaanni meeqqat 14 procentii tikillugit tuberkulosemik tunillanneqarsimallutik.
Tunillaassuunnerup qanoq siammarsimatiginerani nunap immikkoortuini assigiinngissutip erseqqissup saniatigut kalaallinit kingoqqisut kiisalu qatanngutigiit akornanni ukiut qanoq nikingatiginerat, meeqqat tuberkulosemik tunillatsissimanerannut annertuumik aalajangiisuupput.
Bolette Søborgip neriuutigaa misissuinerit inerneri soorlu assersuutigalugu innuttaasut ilaannut nunallu immikkoortuinut, tunillatsinnissaminnut ulorianartorsiornerpaasunut, tuberkulose pillugu immikkut paasisitsiniaanermi atorneqarumaartut.
- Kalaallinit kingoqqisuugaanni allanit kingoqqisuuneq soorlu qallunaanit paasivarput ilaqutariinni qatanngutigiit ukiuisa nikinganerat annikitsuararsuusartoq, taamaalillunilu tunillatsissinnaaneq annertunerujussuulluni, Bolette Søborg oqarpoq.
- Tassa imaappoq: paasisitsiniaanerit pingaartumik kalaallinut sammineqassapput aammalu nunap immikkoortui tunillaassuuffiunerpaat, pingaartumik Kujataa, ilungersuullugu sammineqassallutik, Bolette Søborg naggasiivoq.
Doktorinngorniarneq Kalaallit Nanaanni ilisimatusarnikkut misissuineq pillugu kommissionimit aningaasaliiffigineqarpoq. Bolette Søborgip doktorinngorniarnini oktobarip aallaqqaataani illersussavaa.
