Kujataani meeqqat sakiallunnersut misissorniarneqalerpoq

Nunatta kujataani meeqqat atuanngiffeqareerunik sakiallunnerlutik misissortissapput. Nunatsinni sooq sakialluutip akiorniarnera taama ajornakusoortiginersoq, nakorsat misissuinerminni paasissallugu neriutigaat.

Meeqqat misissuiffigineqarnerat marlunnik siunertaqartoq nakorsap misissuinissami akisussaasuusup ima oqaluttuaraa:

- Siullertut meeqqat sakialluummik tunillanneqarsimasut katsorsarneqassapput taassuma saniatigut nappaat suminngaanniit siaruaanneqartarnersoq misissuinitsinni paasissallugu neriuutigaara, Rigshospitalip nappaatinik tunillaassuuttunut immikkoortortaqarfiani nakorsaq Åse Bengård Andersen oqarpoq.

Dronning Ingridip Napparsimmaviani nakorsat peqatigalugit kujataani meeqqat arfinilinniit 18-inut ukiullit sakialluummik tunillanneqarsimanersut taassuma aggustip naalernerani misissoriartussavai.

Qaqortumi, Narsami Nanortalimmilu meeqqat misissortilerunik immersugassamik immersuissapput. Sakialluttunik nalunngisaqarnersut ineqarnerminnilu atugarisatik immersugassamut allattussavaat. Allattuereerunik meeqqat sakialluutip bakteriaanik tunillanneqarsimanersut paasiniarlugu amiisigut misissorneqassapput aaversissallutillu. Meeqqat oqimaalutarneqassapput qanorlu angitiginersut uuttortarneqassallutik.

- Meeqqat pualavallaartut sakialluummik sukkornermillu nappaateqalernissaminnut qaninnerusarput, Åse Bengård Andersen oqarpoq.

Tasiilami meeqqat 445-t qanittukkut misissorneqarmata paasineqarpoq taakku 7 procentii sakialluummik tunillanneqarsimasut. Nunarsuarmi nunani sakialluttoqarfiusuni 22-ni sakialluttut aatsaat taama amerlatigisuni paasineqarput. Sakialluutip nungusarneqarnera ajornakusooqisoq misissuinermi aamma paasineqarpoq.