Kujataani kulturikkut suliniutit eqeersimaalissapput

Kujataani kommunit pingasut 2009-mi kattutereerpata, kulturikkut aaqqissuussinerit assigiinngitsut illoqarfinni Nanortalimmi, Qaqortumi Narsamilu pisalernissaat, Kujataani Kultureqarnermi Ataatsimiititaliani ilaasortat anguniarusulerpaat. Ukioq ataaseq sioqqullugu pisussat piareersarneqartassapput.

Oqaluuserineqarsimasut pillugit, Lisbeth Søvndahl Pedersen, IA, Qaqortumi Kultureqarnermi Ataatsimiititaliami ilaasortaq ima oqarpoq.

- Takorloorparput illoqarfikkaartuni susoqartarnissaa siumut pilersaarusioreertoqartassasoq, naluneqanngilarmi sorpassuarnik pisoqartitsisoqartartoq, tassami nipilersornerit, ullortunersiornerit assigiinngitsullu pisarput. Pisussallu siumoorlugit allaganngorlugu saqqummiunneqartalernissaat pilersaarutigaarput, Lisbeth Søvndahl Pedersen oqarpoq.

Taanna aperineqarpoq, kulturikkut suliniutit ullumikkornit allaanerusut sooq tamaviaarunnialersaarneraat.

- Imatut annerusumik pisoqarnissaanik aalajangiisoqanngilaq, unaana pineqartoq soorlu nalunngilarput ullortunersiornerit allallu pisoqartarpoq, tamakkulu nalliukkaangata ullormiit ullormut aaqqissuussiniartoqalertarpoq. Massakkullu siumungaaq nalunaaruteqareernitsigut kikkut amerlanerusut soqutiginnillutik peqataajumasoqanersoq piareersimaffiginiarlugu taamatut aaqqiivugut, oqarpoq.

Taanna erseqqissaavoq siumungaaq allagarsiinikkut inuit ilisimatitsinneqartassasut.

- Ullumikkut pisoqartillugu peqataatinneqartartut killeqartarput siumut ilisimatinneqareertannginnamik, Lisbeth Søvndahl Pedersen oqarpoq.

Taanna erseqqissaavoq siunissami kommunerujussuanngortoqarpat aningaasat kulturimut atorneqartussat qanoq agguataarneqartarnissaat.

Taama oqarpoq Lisbeth Søvndahl Pedersen, Qaqortup Kommuniani Kultureqarnermi Ataatsimiititaliami ilaasortaq IA-meesoq.

Ilaasortat aamma isumaqarput Aasiviit nipilersornermilu unammisitsinerit innuttaasunut takornarianullu aliikkutassiissutaasinnaasut.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat