Kujataani kultimik nassaaqqipput
Nanortallip eqqaani nunap immikkoortuani kuulteqarfiusumi Jokums Shearimik taagorneqartumi kuultimik nutaamik nassaartoqarpoq. Jokums Shear, kuulteqarfimmit allamit nassaarineqareersumit, Kuulteqarfik Vagarimik taagorneqartup, avannaata kangiani 90 kilometerinik ungasissusilimmiippoq aamma Kuulteqarfiup Kangerluluup kujataata kitaani 25 kilometerinik ungissusilimmiilluni.
NunaMinerals-ip pisortaata Ole Christiansenip, nassaarineqartoq kingulleq, aatsitassarsiortitseqatigiiffiup Kujataanik kuultisorfissatut suliniutigisaani soqutiginarluinnartutut taavaa.
- Vagar Gold Projektimi ukiormanna siusinnerusukkut qillerinivut iluatsilluaqaat, tassami ujaqqat granit-it assigisaalu kuultimik akoqarluartut paasineqarmat. Maannalu tassa ujaqqani innermik anitsinernit pinngortuni, kuulteqarfiup taassuma iluani 90 kilometerinik avannamut kangisinnerusumi kuultimik nassaarpugut. Tamatumalu ilimagisarput, tassa misissorneqarpianngitsumi kuulteqarfimmik pingaarutilimmik peqarnera uppernarsarpaa, Ole Christiansen oqarpoq. Taassumalu erseqqissarpaa, tamaani nunap sannaa, Amerikami Avannarlermi maanna kuultisiorfiusunut assingusorujussuusoq.
Qillerinernik misissuinerit aallartereerput. Tamakkulu aasaq manna nassaarineqartut misissorluarnissaannut, Nanortallillu eqqaani kuulteqarfiup Vagarip siunissami misissoqqissaarneqarnissaanut iluaqutaajumaarput.
